首先申報利益，世界盃期間功夫茶係有賭波嘅，不過投注額屬於蚊量級，一百幾十嗰隻，小兒科之至。輸得最慘係買英格蘭贏波，結果受累於超錯球證以及拋錨球員，一個二個卒之起錨返鄉下咯。咦，聽講話成班英軍不知羞恥，輸咗波即刻大吃大喝開香檳歎雪茄，吹到你啤一聲！
點解要申報利益呢？事關呢個係今時今日嘅熱門課題：睇波唔賭波，生活樂趣多；賭波莫賭多，否則闖大禍！
開講都有話啦，小注怡情，大注亂性，睇波期間係咁意投注一百幾十係幾過癮嘅，愛隊又贏波，自己又贏錢，爽呀！之不過咁，爆冷呢家嘢係今屆世界盃特色，加上嗰個估佢唔到嘅「普天同慶」鬼影變幻球，仲有一大班亂吹ＢＢ嘅低Ｂ球證，想贏好鬼難，要輸易到極。
呢嗱，搞出人命嘞，有一個四十七歲男子喎，相信係賭波輸命，由大坑勵德邨二十六樓一躍而下爆頭破肚慘死。跳樓現場有大量賭波指南以及投注波飛散滿一地，九成九係有人心灰意冷之下先掟波飛落街再同歸於盡。
唉，病態賭徒家散人亡嘅古仔，人人聽到耳熟能詳，之但係又唔知點解喎，硬係依然有咁多人屢勸無效。
話時話，政府嘅反賭波宣傳政策勁無稽。係人都知獨家播放世界盃嘅係一間收費電視台，搞到好多球迷嬲到震，知唔知政府戇居成點？佢哋只係集中喺兩間免費電視台宣傳反賭波，收費電視台居然唔見。打個譬喻，你想勸地球人放下屠刀立地成佛，唔好姦淫擄掠打家劫舍殺人放火，宣傳片冇理由走去火星播放啫！
計功夫茶話齋，政府假如有心勸人戒賭，不妨搵球壇名將譚兆偉諗諗計，合作拍一拍宣傳片之類，因為呢一位前香港足球先生曾幾何時亦係賭海沉淪，沉到差少少冇命。譚兆偉家陣回頭是岸嘞，今屆世界盃一毫子都冇落注。浪子回頭金不換，如果由譚兆偉現身說法，反賭波嘅效果一定好好多。
講到呢度，功夫茶或者有必要連一百幾十都慳番，學譚兆偉一毫子都唔落注。畢竟一毫子都係錢，慳得一蚊得一蚊吖嘛。更何況，輸錢皆因贏錢起，萬一符符碌碌扑中幾場超級大冷門，贏到不能自拔咁點算呀？
咁啦，反正世界盃過咗大半嘞，剩番好少場比賽啫，一於專心睇波唔賭波。又或者咁，學美國總統奧巴馬，唔係話唔賭，只係賭牙骹，輸家請贏家飲啤酒。
至於特區政府咯喎，好心生性啦，唔該做多啲反賭波宣傳。喂喂喂，警方唔好忘記出盡奶力冚外圍，因為外圍莊家好冇人性㗎，賭仔明明窮到褲穿窿都可以篤手指投注一百幾十萬，輸咗就逼到人哋走投無路，家散人亡嘅古仔好多時就係因此而起。
總而言之，戒賭熱線：一八三四六三三。