講開沙田龍華酒店，相信好多老香港都會有唔少美好回憶，話唔定拍拖求婚都係多得呢個歷史悠久嘅景點。有人去過食乳鴿，有人去過撐枱腳，有人去過拍電影。係呀，拍電影呀，李小龍經典名作《唐山大兄》就曾經喺龍華酒店取景。至於大文豪金庸以及梁羽生等等咯喎，亦都試過長駐龍華酒店閉關寫作。
既然龍華酒店充滿傳奇色彩，盛載香港人咁多集體回憶，係咪應該好好保育呀？係咪應該盡力活化呀？毫無疑問，絕對應該，而且事實上業主已經身體力行，出錢出力打算開設「龍華生活文化村」，定期舉辦展覽會，另外又計劃開闢土地作為生活農場，畀學生哥一嘗耕種滋味，等小朋友親身體驗何謂「誰知盤中飧，粒粒皆辛苦」。
可惜吖，理想歸理想，現實好殘酷，業主活化大計居然受到政府官僚阻頭阻勢！
件事係咁嘅，龍華酒店業主鍾太名下有一幅面積七百七十一平方米地皮，諗住不如開墾為生活農場啦，推廣環保意識吖嘛，點不知，一經巡視之下發覺，地皮有超過一半面積被人佔用，仲起咗五間寮屋添。鵲巢居然鳩佔，最自然嘅反應當然係報官究治。哈，荒謬事情發生嘞，地政總署不但以「私人糾紛」為由拒絕受理，反而話部分地皮屬於官地，要求鍾太還原。
呢嗱嗱嗱，呢啲就係叫做唔化。人哋含冤受屈向你求助，你唔去主持公道不特止，仲要伸多兩腳落井下石，當事人唔激氣就假咯。打個譬喻吖，世界盃英格蘭入波判無效，已經夠冤枉啦，假如球隊向國際足協投訴，國際足協以「私人糾紛」為由拒絕受理，你話係咪講唔通？當然啦，荒謬還荒謬，國際足協辦事作風其實同特區官僚差不多，錯判就係錯判，永遠唔會撥亂反正，更加唔會引入高科技監察系統防止發雞盲球證亂吹一通。
按照龍華酒店斥資一千萬分三期進行嘅活化大計，構思相當唔錯㗎。首期工程包括將園內舊有菊花園裝修成有香港特色嘅庭園，設有涼亭、假山以及魚池等等，將會定期舉辦蘭花展。李小龍取景拍攝《唐山大兄》嘅龍華廳又會改建成「李小龍廳」。園內另設小屋，安置歷史圖片同珍貴文物，成為龍華酒店博物館。
唉，官僚主義硬係成事不足敗事有餘，呢頭講保育，嗰頭講活化，做出嚟就變咗神神化化。好心地政總署唔好咁頹廢啦，萬一有人霸佔禮賓府，無端端起咗幾間寮屋，係咪又以「私人糾紛」為由拒絕受理呢？如果係咁，功夫茶第一個衝入去立地為王！
話時話，前一排最熱門嘅保育話題係《歲月神偷》取景地點上環永利街，家陣有乜活化大計冇呀？計功夫茶話齋，唔做助力都唔好做阻力，唔做英明球證都唔好做盲丙判官，永利街唔搞到烏厘單刀已經還得神落！