叮！公公按動平安鐘。叮叮！婆婆按動平安鐘。叮叮叮叮叮！公公婆婆集體猛撳平安鐘，聽講高峰期同一時間超過二千宗！
長者平安鐘點解會響個不停嘅呢？一個字：熱到甩肺。大家可能會話，喂，熱到甩肺明明係四個字唔係一個字。冇辦法，天氣實在太熱，熱到功夫茶暈陀陀！
好，飲啖冰水清醒下先……得咗，繼續。
既然熱成咁，功夫茶想問一問環境局局長邱騰華，嗰個害人不淺嘅停車熄匙政策仲有冇必要實施呀？冇錯，確係害人不淺。早幾日之嘛，有一位八十一歲小巴司機響應停車熄匙呼籲，結果焗到中暑，最後一命嗚呼。
功夫茶實在唔明最初係邊個蠶蟲師爺諗出呢一項傻謀笨策，正常香港夏天已經熱到抽筋，加上地球暖化不斷升溫，停車熄匙根本就係行唔通。好嘞，家陣真人真事熱死人，點算？
邱騰華本來一味死撐，話停車熄匙係參考外國做法。唉，外國月亮可能特別圓，不過搬字過紙隨時撞大板。舉一個實例吖，外國人話儲存紅酒最好係「室溫」，你試下喺香港用「室溫」存酒吖，包你幾個月報廢。冇辦法，人哋室溫係十幾度，香港室溫係幾十度，完全係兩個世界。同一道理，停車熄匙喺風涼水冷嘅外國行得通，唔代表喺香港冇問題，紅酒報廢仲係小事，司機報廢先至大劑！
眼見職業司機群情洶湧聲討環境局罔顧人命一意孤行，邱騰華開始有少少軟化迹象嘞，佢話喎，會考慮喺酷熱天氣之下容許公共車輛豁免停車熄匙。
咦咦咦，咪住先，有俗稱「熱狗」嘅巴士由於冇冷氣，搞到有司機中暑。其實唔止揸車嘅司機出事，坐車嘅乘客一樣難頂。好似電車咁吖，熱浪逼人之下變咗蒸籠，搞到有女乘客嘔白泡昏迷。
熱狗巴士冇停車熄匙一樣瓜得，不設冷氣嘅電車又蒸得熟人肉燒賣，咁即係點？即係話香港炎炎夏日火辣辣嘅天氣係冇可能冇冷氣嘅，以酷熱天氣作為豁免標準未必萬事大吉。試問，假設三十度以上算係酷熱天氣，莫非二十九度就唔會熱死人？唔好玩啦，邱局長！
所以咯喎，計功夫茶話齋，與其豁免，不如取消。停車熄匙呢一項傻謀笨策徹頭徹尾行唔通，豁免都係嘥氣嘅啫，一於趁佢未出世，人工流產算吧啦！
話時話，職業司機向邱騰華下戰書，要求局長大暑之日去站頭親身感受停車熄匙長時間等客嘅痛苦滋味。如果邱局長真係夠膽死應戰，麻煩救護車就近戒備，記住唔好停車熄匙喎，一來自己唔會焗暈先啦，二來咯喎，咁就可以第一時間將一名嘔白泡中國籍男子送院治理吖嘛！