望到頸都長嘅《食物安全條例草案》終於提交立法會審議，借用最新官場潮語，即係就快「起錨」嘞。不過咪開心住，依家距離條例正式實施仲有幾個月時間，為安全起見，大家最好繼續忍口。
食物及衞生局喺條例草案建議引入食物追溯機制，要求食物進口商及分銷商強制登記，並且要保存交易記錄。不過咁，條例尋日先至喺立法會進行首次討論，最快都要今年十一月至有望生效，食物安全專員陳漢儀承認，新例生效前要追溯問題食品來源有困難。即係話，就算再出現類似毒帶子嘅食物事故，當局亦只能「呼籲」市民暫停食用，市民就算中咗招都冇仇報。
病從口入，禍因官起。食物安全條例又唔係政改方案，社會毫無爭拗，各界早就要求盡快推出，點解政府一拖再拖，拖足十幾年仲喺度紙上談兵呢？
十幾年來，香港好似不設防咁，食物事故不絕於耳，孔雀石綠淡水魚、山埃蘇眉、蘇丹紅鹹蛋、哮喘藥豬肉、三聚氰胺毒奶等，鋪鋪都長驅直入，當局直到早排毒帶子攻陷香港，卻搵唔到源頭，導致民怨沸騰，至臨急抱佛腳做嘢，你話係咪荒謬吖！
有議員怒斥政府歎慢板，港人食物安全權益被犧牲咗十幾年，形容草案係「遲到好過冇到」，講得一啲都冇錯。不過功夫茶更加擔心嘅係，就算條例實施之後，如果當局唔加強監管，從嚴執法，有法例等於冇法例，香港咪一樣係冇掩雞籠。
話時話，政府監管不力，食物事故不斷，毒帶子不過係冰山一角咋。本港嘅食物安全及防疫體系漏洞處處，根本不堪一擊。面對無日無之嘅食物事故，當局固然束手無策，而對於千奇百怪嘅病毒輪番攻擊，當局更加係投晒降。
呢，香港大學研究發現，Ｈ１Ｎ１甲型流感病毒有可能已重回豬隻身上，出現基因洗牌，隨時出現人傳人，甚至觸發全球流感大爆發。有專家警告，到時「全球絕對不只死二、三萬人，亦可能不只死二、三十萬人」。問你怕未！
政府又點回應呢？佢哋話會加強監察喎。問題係，當局點監察呢？一旦最壞情況出現，有冇一套應變措施去對付呢？想當年，「沙士」大爆發，防疫系統即時「拋錨」，搞到香港一夜成為疫埠，死得人多，皆因當局後知後覺，反應遲鈍嘅咋。
除咗豬流感病毒變種，同樣得人驚嘅係手足口病高峰期仲未過，本港感染個案已經超過四百一十宗，比以往全年數字仲要多出一倍，係十年來新高。衞生防護中心話，本港仍處於手足口病嘅高峰期，預計疫情會持續多幾個禮拜。
手足口病個案短期內倍增，情況極唔尋常，不妨問吓班衞生高官，除咗等運到，寄望數字慢慢回落，佢哋有冇制訂應對方案呢？有毒食品就話可以呼籲市民唔好吞落肚啫，手足口病透過飛沫傳播，萬一疫情一發不可收拾，唔通叫市民「收口」，連氣都唔抖？
計功夫茶話齋，香港真係撞邪，呢樣毒嗰樣菌，搞到市民冇啖好食，連氣都冇得抖。唉，靠跛腳鴨政府一定死硬，大家惟有打醒十二分精神，自求多福啦！