世界盃塵埃落定咯，西班牙登基稱王咯，男人老狗唔使再捱更抵夜，足球寡婦唔使再獨守空幃。假如你係八發八中八爪魚神算保羅嘅忠實粉絲，會唔會寫封信去德國水族館多謝佢帶挈你贏到開巷呢？若然你真係寫信畀「有球必應」嘅保羅表揚佢準過黃大仙，功夫茶建議你親自落街搵一搵充滿殖民地懷舊風情嘅郵筒，用實際行動支持保育文物吖嘛，等官老爺唔好以為古董冇用。
咦，咪住，未講保育之前，功夫茶想同大家玩一玩常識問答遊戲。問題係，香港郵筒係乜嘢顏色？一二三，答！如果你答綠色，恭喜你，你與時並進；如果你答紅色，恭喜你，你飲水思源。冇錯，家陣嘅郵筒係綠色，以前嘅郵筒係紅色。功夫茶認為，始終係紅色郵筒最正宗，而且最有象徵意義，事關英國殖民地政府認為郵遞服務必須十萬火急，所以郵筒同消防水喉一樣係紅色。
好嘞，保育。大家都知啦，傳統郵筒係香港一大特色，好多人去咗外國一段日子，一返到香港見到紅彤彤嘅郵筒簡直好似老友重逢咁興奮。假如郵筒上面仲刻有象徵皇室大寶號嘅字款，好似ＶＲ、ＥＲ或者ＧＲ，更加係彌足珍貴，直情要攞部相機出嚟拍照留念。
講到呢度，係時候向大家介紹一個荒唐建議。文物保育專員辦事處話喎，最近聯絡香港郵政，建議保留九個擁有五十至一百年歷史嘅郵筒，畀市民有機會接觸呢一類街頭文物。
計功夫茶話齋，所謂保育專員根本就係毀育專員，點解淨係保留九個古董郵筒咁少呢？點解唔全數保留呢？雖然話英殖時代鑄造嘅郵筒已經買少見少，但係始終仲有五十七個健在，即使歲月無情，仍然堅守崗位。如果功夫茶係保育專員，一定會話，五十七個全數保留，一個都不能少！
呢嗱嗱嗱，你話係咪荒唐吖？建議五十七個郵筒保留九個，即係將四十八件街頭文物報廢，呢種大屠殺行為只有敗家仔先至做得出。打個譬喻吖，香港有五十七位百歲人瑞，全部行得走得食得瞓得，你會唔會話，保留九位老人家，其餘人等拖出去斬？古色古香嘅郵筒只要冇穿冇爛功能正常，你就唔好搞佢啦！
莫講話舊式郵筒唔應該報廢，真正嘅保育思維應該係全面維修，而維修工作包括將綠色還原為紅色。可能功夫茶特別念舊啩，硬係覺得綠色郵筒篤眼篤鼻，成隻綠魔怪咁款。
所以話啫，香港官僚嘅保育工作永遠撞板多過食飯，而且一味左拆右拆乜鬼都話拆。呢頭拆完天星鐘樓，嗰頭又拆皇后碼頭，家陣仲輪到惡搞郵筒。有時你又難怪咁多八十後年輕人把幾火上街遊行，因為佢哋其中一個訴求就係，喂，香港城市規劃唔好千篇一律悶到嘔得唔得？留番少少歷史感覺好唔好？
唉，保育專員保你大，手下留情唔好毀滅郵筒啦，唔該！