漢奸果然係漢奸，乜都背叛得一餐。呢個奸性不改嘅李柱銘，聲稱假如民主黨大會通過支持「一人兩票」政改方案，佢會考慮退黨喎。
計功夫茶話齋，即使李漢奸自己唔退黨，民主黨都應該將佢掃地出門啦，邊可能容許所謂創黨主席吃裏扒外搞搞震㗎！邊可能任人做「黨奸」o架！
民主到底係乜東東？可以講得好複雜，亦都可以講得好簡單，一句講晒，少數服從多數。好嘞，既然民主黨舉行黨大會投票決定是否支持政改方案，你咪去投反對票囉，萬一支持票多過反對票，你咪按照遊戲規則認輸囉，然後遵從黨路線辦事。家陣嘅李漢奸就唔同嘞，硬係要破壞遊戲規則，支持票多過反對票，佢唔服從，一於退黨。
咁嘅態度有資格認做民主之父？慳啲啦，民主之腐就有份！
嗱嗱嗱，大家睇清楚偽君子嘅真面目。李漢奸口口聲聲話要爭取民主，之但係，當民主黨苦心經營一步一步邁向雙贏局面，難得中央政府開綠燈，政改方案有機會擴大民主成分，哈，反而佢自己跳出嚟阻住地球轉。民主黨李永達講得都算客氣咯，淨係批評佢不應「你贏就大家跟你，你輸就話退黨，呢種唔係太過有民主胸襟嘅做法」。如果係第二個，直情會老實不客氣質問李漢奸：你係咪一定要搞到全黨以至全港雞犬不寧亂糟糟先至安樂呀？
民主黨資深黨員司徒華就講得啱啦，任何人退黨都冇影響，「天要下雨，娘要嫁人，佢鍾意點做就點做」。聽到未吖，李漢奸！
家陣嘅李漢奸，十足十就係暴戾到極嘅非理性激進派，有佢講，冇人講。依照激進派嘅野蠻邏輯，唔係朋友就係敵人，所以終於同中央有偈傾嘅民主黨被抹黑為「出賣民主」，甚至以更難聽嘅爛仔語言破口大罵。功夫茶想請教，乜政治唔係妥協嘅藝術咩？點解一定要誓不兩立對着幹？
講開李漢奸，好自然就令人諗起同佢着埋一條褲嘅淫賤黎。呢個淫賤黎亦係奸性不改，與李漢奸等人合組「搞事四人幫」，一味鼓吹所謂五區公投，惟恐天下不亂。雖然所謂公投最終以失敗收場，淫賤黎繼續激進，繼續搞搞震，卒之搞到成個香港亂七八糟，烏煙瘴氣。
講到呢度，功夫茶想同大家研究一個問題，點解李漢奸會不惜背叛黨友都要喺政改方案從中作梗呢？點解淫賤黎會不惜與香港市民為敵呢？或者可以咁樣講，佢哋有任務在身，總之就係要攪亂檔，唔可以畀香港有任何進步空間，所以遇佛殺佛、見友劈友！
功夫茶始終相信，民眾眼睛是雪亮的。與其等李漢奸退黨，不如由黨友主動唾棄，清理門戶。至於淫賤黎，辦報辦到陰陽怪氣，完全唔係為民喉舌，一係誨淫誨盜，一係反中亂港，咁嘅淫媒，唔受到讀者離棄至怪。
即係咁，只要做得好，人人當係寶，一旦做得差，棄之如爛渣。李漢奸同淫賤黎呢一對反中亂港二人組，唔搞到眾叛親離就冇天理咯！