九九九，誰是狗殺手？真係冇陰功咯，好多人視狗如命，直情當正愛犬係自己心肝寶貝屋企人一樣疼惜，甚至乎同床共寢添，萬一有乜冬瓜豆腐，名副其實如喪考妣。元朗有一隻十四個月大史納沙狗女失驚無神吐血暴斃，悲痛欲絕嘅主人本來都唔知發生乜嘢事。
正所謂，天網恢恢疏而不漏，死狗原因終於有眉目嘞，狗殺手有機會緝拿歸案。街坊向狗主透露，原來食環署曾經派人去過遇害狗女經常出沒嘅渠口同後巷放置杜鼠毒藥，之但係又冇張貼任何警告喎，所以最合理嘅懷疑就係，主人毫無防備之下放狗，一隻精靈活潑可愛嘅史納沙狗女誤食鼠藥中毒身亡，而且聽講死狀相當恐怖，滿身鮮血嗰隻。
嗱嗱嗱，呢啲就叫做滅鼠不成毒死狗。大家可能會話，冇錯係沙塵滾滾殺錯良民，狗女無疑死得好冤枉，之但係何以見得滅鼠不成呢？即係咁，如果滅鼠唔係失敗，冇理由全港十八區鼠輩橫行。尋日之嘛，觀塘茶果嶺村有一位六十九歲大叔，喺屋企瞓瞓下覺，右腳腳趾忽然劇痛，懷疑係老鼠咬傷。唔知好嬲定好笑，同一位大叔前一個月查實已經被老鼠咬過左腳，計埋今次咬右腳，家陣即係兩隻腳先後淪為老鼠點心。
最轟動嘅一次老鼠襲人事件，莫過於冇耐之前中環大街大巷居然有一隻巨型老鼠走出嚟咬傷英國女遊客，搞到香港蜚聲國際，外國人不但知道香港有一個人扮嘅米奇樂園，更加係一個貨真價實嘅老鼠之都。
咦咦咦，咪住先，功夫茶想問問大家，生勾勾亂咬人嘅老鼠固然得人驚，死老鼠會唔會更加可怕？唔知大家點睇，功夫茶就覺得死老鼠先至係萬惡之惡，你知啦，死老鼠又霉又爛又充滿細菌，直情係散播病毒嘅大殺傷力武器，嗰種惡心場面可以列作淫褻及不雅物品包膠袋。沙田新城市廣場有一間食肆喎，最近就有一隻死老鼠從天而降，擊中一名倒楣到極嘅食客，好彩冇嚇到心臟病發咋！
既然通街都係老鼠，鼠患嚴重到極，當心造成鼠疫，食環署滅鼠係咪應該出盡奶力？唔使問啦，梗係應該，可惜食環署係一支荒謬絕倫嘅低能部隊，老鼠多嘅地方唔放鼠藥，老鼠少嘅地方嚴陣以待，總之滅鼠不得其法。
講到尾，滅鼠即係防疫，老鼠咬人最令人擔心嘅唔係皮肉之傷流幾滴血咁簡單，怕就怕傳播鼠疫。知唔知二十世紀初香港嘅鼠疫死咗幾多人？二萬呀！以全球計，呢場鼠疫殺咗一千二百萬人！
所以咯喎，唔該食環署唔好咁低能啦，叫你去消滅老鼠，唔係去毒死狗狗。今次就話狗主痛失愛犬啫，萬一下次父母痛失子女，被亂擺亂放嘅鼠藥毒死，邊個賠得起！