真係唔明，點解特區政府做嘢成日「出人意表」，事與願違，畀人笑到面黃。嗱，當局又鬧出居屋示範單位變「是但單位」嘅笑話嘞。
話說最新一期居屋貨尾三千幾個單位尋日起接受申請，因為售價平過私樓，吸引好多唔想繼續捱貴租嘅中產人士嚟索取表格。當局亦開放有裝修同冇裝修嘅多個示範單位畀市民參觀，話等佢哋可以睇清睇楚至決定買唔買喎。
本來，因為樓層高低坐向唔同，大細單位設計有別，示範單位畀人批評係「牙籤海景」、迷你房，彈多讚少並唔出奇。弊就弊在百密一疏，其中有個別示範單位嘅冷氣機居然不停咁滴水，嚟參觀嘅市民睇到眼都凸埋。
表面睇，冷氣機滴水唔涉及樓宇結構，亦唔屬安全隱患，但政府成日提醒市民，話冷氣機滴水滋擾他人屬於違法，一經定罪要面對重罰。當局咪即係帶頭滋擾他人？
正所謂，見微知著，小問題背後往往隱藏大隱患。示範單位有名你叫，係為咗展示賣點，吸引買家。市民可能要用盡畢生積蓄去買居屋，攞啲咁嘅示範單位出嚟獻世，唔通居屋貨尾單位係賣剩蔗、籮底橙？都唔知當局想推銷居屋定想趕客，直頭係倒自己米。正如嚟參觀嘅市民話齋：「連示範單位都未執好，其他單位更加唔知點，如果買就真係要驗清楚。」
據講，示範單位係照住政府增加賣樓透明度嘅「九招十二式」嚟做，但照樣係甩甩漏漏一鑊泡，「清水房」分分鐘可能變漏水房，增加嘅唔係透明度，而係市民對居屋質量嘅更多質疑。
講到質疑，有樣嘢政府仲欠市民一個明確交代。房屋署日前突然宣布，呢次會抽起天水圍天頌苑嘅八百個單位，理由係屋苑嘅管理費問題爭議仲未解決。查實天頌苑早已經起好，多年前曾經因為被發現短樁要補樁而要押後推出，後來又因為政府停售居屋再延遲銷售，至變成貨尾居屋。
呢次被抽起唔賣嘅，又係天頌苑，到底係有咁啱得咁蹺，定係另有內情？政府有必要講清講楚。市民真金白銀買樓，如果到時節外生枝，令小業主身陷困境，搞到唔湯唔水，唔上唔落，邊個孭飛先？
講開又講，買樓係普羅市民嘅人生大事。由於政府規劃失當，近年樓市供求失衡，樓價飆到離晒譜。應唔應該復建居屋，社會爭拗不斷。煲呔曾怕重蹈老懵董覆轍，根本唔想再起居屋，因為敵唔過輿論壓力，至係咁意就應否資助市民置業展開諮詢，其實不過係做騷。
近排政府顧住政改「起錨」，有關諮詢變咗無聲無息拋晒錨。咪話功夫茶唔提醒政府吖，政改方案已經過骨，唔該打醒十二分精神，快快趣趣就長遠房屋政策作出清楚交代，求其是但當「示範」，市民一定唔收貨！