嘩？吓？乜嘢話？唔係啩？大——樹——又——塌——下！
唉，冧樹呢家嘢，冇得賴天災，你話唔係人禍都唔得。尋日之嘛，黃色暴雨警告之下砰砰磅磅連環冧樹，冧完一棵又一棵，至少冧咗六棵。最得人驚嘅係，冧樹居然冧到政府總部，結果車毀人傷！
中環皇后大道中近雪廠街同炮台里，即係政府總部對開路面，一棵大約十五米高、一米闊嘅大樹，失驚無神仆落街，一名男子被壓傷，一架的士被壓毀，遇害途人同司機雙雙送院治理。
好彩咋，真係要劏雞還神，今次唔使再死人，算係不幸之中嘅大幸。
血的教訓相信大家依然記憶猶新，而且猶有餘悸。赤柱冧咗一棵刺桐，殺咗一名女學生；沙田冧咗一棵盾柱木，死咗一位單車男；今次冧嘅係乜嘢樹呢？原來係一棵估計八十歲嘅榕樹。
普通常識話畀大家知，榕樹係長壽樹種，過百歲，濕濕碎。好似位於廣東新會嘅「小鳥天堂」咁吖，一樹成林養活萬千雀鳥嘅榕樹就有幾百年歷史。換言之，八十歲榕樹其實係好後生㗎咋，咁都冧得落嚟，一定唔係壽終正寢死於自然，而係同環境因素有莫大關係。
冧完一棵又一棵，到底政府搞邊科？難怪沙田冧樹死者蔡傑強嘅太太好悲哀咁講：「真係好唔開心，接二連三冧樹，政府完全冇吸取教訓！」
咦，立法會議員王國興有一個好提議喎，佢話：「最好大樹擊中唐英年，咁樣政府先得到應有教訓。」
計功夫茶話齋，呢個提議冇得頂，一來合乎天理，二來合乎人倫。你知啦，赤柱冧樹殺人之後，政務司司長唐英年煞有介事率領跨部門小組商討對策，最終決定成立樹木管理辦事處。當你以為樹木辦一定有辦法杜絕同類事件啦，嘭！沙田冧樹又殺人！嘭嘭！今次禍延至中環！嘭嘭嘭嘭嘭嘭嘭！功夫茶提提大家，行街最好戴頭盔！
即係咁，針唔拮到肉唔知痛，樹唔扑中頭唔知衰，只要唐唐捱過冧樹浩劫，樹木辦先至可以有望升格，唔再做毫無建樹嘅廢柴。係呀，冇錯，今時今日嘅樹木辦只係一碌有姿勢冇實際嘅廢柴，靠佢哋管理全港幾十萬棵樹？唯一希望就係一嘢兜頭扑醒唐唐。
喂喂喂，咪住先，睇怕大樹倒下扑中唐英年嘅機會愈來愈高，家陣連官家重地政府總部都出現車毀人傷冧樹事件，難保唐唐唔會中招。
冧樹害人禍連連，最好扑醒唐英年，呢個毫無疑問係合理期望。之不過咁，扑還扑，功夫茶呼籲老天爺「樹下留情」，係咁意輕輕扑傷好喇，無謂搞出人命吖。
點都好啦，樹木辦呀樹木辦，醒少少當幫忙得唔得？今次就話政府總部出事啫，下次冧樹冧到禮賓府點算？扑濕屋主尚屬次要，壓爛受保護歷史文物罪大惡極吖嘛！