好嘅唔靈醜嘅靈，申訴專員黎年日前啱啱炳完政府部門各家自掃門前雪，處理投訴互相卸責，點知話口未完，就有懶官出嚟示範乜嘢叫做各家自掃門前雪嘞。
大埔荔枝山村路邊一棵細葉榕，近日有幾百條毛蟲由樹幹爬上爬落，恐怖夾核突。有村民嘗試用殺蟲水噴殺，但由於毛蟲太多，殺蟲水都冇符，惟有報警同打「1823」政府熱線求助。
嗱，好戲開始嘞。首先到場嘅係警員，佢哋只係用膠帶圍住棵樹，警告途人勿近，跟住就揚長而去，冇晒下文。然後過咗幾粒鐘，村民至接到政府熱線職員回覆，話食環署同康文署派人去過現場「視察」，發現棵樹唔屬呢兩個部門管喎。
唔屬呢兩個部門管，咁又屬邊個管呢？哦，既然樹生喺路邊，咁即係關路政署事喇，點知路政署仲懶，連回覆都費事。於是乎，拖足十二粒鐘，到傍晚先至有食環署人員蒲頭，係咁意望兩眼，清理咗啲蟲屍之後就走人。署方其後話，個案已經轉介畀地政總署跟進喎。
捉蟲咁簡單嘅事，先後經過警方、食環署、康文署、路政署同埋地政總署五個衙門，推來推去，兜兜轉轉都冇人認頭，搞足成日依然蟲照爬，人照驚。唉，旨意呢個廢柴政府有所作為？慳番啖氣好過啦。
政府部門齊做大懶蟲，互相卸責，互相交波，對住毛蟲束手無策，呢個荒謬個案不過係冰山一角咋。申訴專員黎年日前喺上任後嘅首份年報中，狠批政府部門各自為政，畫地為牢又欠缺協調，對問題袖手旁觀，令市民投訴無門。
其實，市民嘅投訴，有邊次唔係畀政府部門當波咁踢嚟踢去？有邊次唔係石沉大海，不了了之㗎？好似樓宇滲水問題咁，多年投訴不斷，食環署同屋宇署隆而重之聯手成立咗一個「滲水辦」，但兩個部門一樣係你推我卸，試過為同一個案「互相轉介」咗七個禮拜，甚至有啲個案兩年都無人處理。話就話「一站式」服務，其實係一條龍卸責就真。
更可怕嘅係，你有你投訴，佢有佢敷衍，唔搞出人命都唔知驚。前年赤柱冧樹壓死港大女生後，當局煞有介事喺今年初成立所謂樹木辦同綠化辦，但多個涉及樹木管理嘅部門仍然各自為政，各唱各調，連風險評估標準都冇辦法統一，直到前排沙田圓洲角重演冧樹殺人慘劇，當局至應承公布危樹名冊。官僚為禍，足以攞命，真係一啲都冇講錯。
講到互相卸責，大家仲記得好多年前有單經典案例嗎？話說將軍澳有人將衫褲棉胎晾到通街都係，好似掛萬國旗咁，五顏六色，有人向當局投訴，但各部門你推我讓，始終冇人肯認頭，搞到連申訴專員都忍無可忍，發炮猛轟，當局先至責令時任政務司司長嘅曾蔭權出嚟收拾殘局。你話喇，連解決通街晾衫嘅問題都要出動到特區第二把手，香港有乜法子唔搞到亂七八糟吖！
話時話，煲呔曾解決晾衫問題就得啫，至於做其他嘢咯喎，咪又係撞板多過食飯，唔怪得畀人鬧「廢廢地」。計功夫茶話齋，上樑不正下樑歪，煲呔曾廢廢地，手下想唔廢都唔得喇。呢，連捉蟲咁小事都搞到一鑊泡，呢個政府唔止廢廢地，直頭廢過廢柴！