吓？乜嘢話？公屋加租？唔使多講，人人嗌慘。不如聽聽街坊街里有乜心聲先啦——
朱小姐：「住得公屋收入都唔多啦，得丈夫一個做嘢，搵幾千蚊，個仔讀幼稚園一個月要畀二千九百蚊，生活費已好緊張，加租嘅話負擔會增加。」
馬先生：「做緊臨時工，公司仲要減人工，真係搵兩餐都難，依家都要交三千幾蚊屋租，仲要養三個小朋友，仲加屋租？唔好喇啩。政府都唔理啲小市民。」
李太太：「我唔覺得街坊收入增加，成條邨好多長者都執紙皮，加租我就慘，可能要申請租金援助或者綜援。」
房屋署話喎，檢討過公屋租金以及住戶收入，發覺公屋住戶去年收入普遍較○七年上升，所以房屋委員會按新修訂《房屋條例》首次啟動可加可減機制加租，加幅百分之四點六八，即每月加租十一元至一百五十七元不等，最快九月實施，全港六十八萬戶受影響。
加租梗係不受歡迎㗎啦，所以咯喎，房屋署為免激發民憤，考慮寬免一個月租金，盡量安撫反彈情緒。免租一個月大概可以抵銷未來兩年大部分額外支出，變相平均加租只係百分之零點三。
唉，朱小姐冇講錯，住得公屋唔慌係高收入一族，唔使執紙皮都偷笑咯，即使加租一百幾十都係沉重負擔。雖然話有機會免租一個月啫，之但係長遠嚟計始終相當吃力。功夫茶都係屋邨仔長大，絕對明白草根階層啞子食黃連有苦自己知嘅慘況。
如果話公屋加租好鬼慘，其實冇資格住公屋嘅蝸居一族更加慘。根據地產公司研究顯示，去年私人住宅平均租金上升百分之十八點七，今年頭五個月租金就升咗百分之五點五。私人住宅租金連續十四個月上升，由去年三月呎租十三點二元，升至今年五月十七點四元。地產公司更加預測，租金可能重回九七年高位，即係呎租超過二十元！
嗱嗱嗱，你話嘞，冇資格申請住公屋而被迫租用私人住宅嘅蝸居一族，係咪慘上加慘？假設呎租真係升到二十元，豆腐膶咁細嘅四百呎單位都要月租八千，收入隨時冇咗一大半，開飯都成問題啦！
喂喂喂，蝸居一族唔好奢望升格做業主，事關家陣樓價升到離晒大譜，癲價七萬元一呎嗰啲瘋狂豪宅唔計嘞，市區樓閒閒地呎價過萬，邊個買得起呀？莫講話草根階層望樓興嘆，連專業人士都鞭長莫及，醫生律師一個二個怨聲載道。
講來講去，又係全港最大地主特區政府累事，硬係明益地產商，害到小市民雞毛鴨血。如果唔係明益地產商，有乜理由名義上買一個四百呎單位，實際上只得三百呎？豆腐膶變咗豆腐乾，擺明車馬搵你笨。
總而言之，公屋加租好鬼慘，蝸居一族慘上慘，如果政策利益繼續向地產商傾斜，功夫茶提提你，慘到盡頭就係反，反到你腳痛落台嗰隻呀，老細！