禍從口出，自取其辱。「母夜叉」導遊狂鬧內地旅客事件餘波未了，無良業者劏客毒招陸續曝光，尤其係港府零監管，導致趕客醜聞無日無之，令旅遊業聲譽衰到貼地，更加成為眾矢之的。
旅發局主席田北俊怒斥女導遊所作所為「影衰晒香港人」，佢話如果旅遊業議會「管唔掂」，應由港府發牌規管導遊，如果唔係，旅發局宣傳推廣講到天花龍鳳都冇人信！
田少就講得啱喇，旅發局年年使一大筆錢去世界各地推廣香港，點知一單醜聞就搞到前功盡廢，你話啲錢係咪使得冤枉吖！
其實，影衰香港人嘅唔止惡導遊，仲有呢個無能政府。如果當局唔係卸膊，始終唔肯負起監管責任，點會搞到醜聞一單接一單，香港個朵臭晒吖。話時話，如果仲唔改變「自己人管自己人」嘅做法，旅遊業唔止自己玩死自己，遲早連香港都玩死埋。
導遊強迫旅客購物多年來普遍存在，而且愈做愈狼，甚至搞出「激死旅客」事件，但當局幾時有正視過呀？業界年前推出所謂「誠信遊」，可惜依家都只係佔所有內地團嘅一成半，簡直係失敗中嘅失敗。
當局唔監唔管，無良導遊唔變成「母夜叉」至奇啦。呢，有位旅遊巴司機踢爆，話業內強迫內地客購物嘅情況非常普遍：「十個團當中，有三、四個團都會嗌交、鬧人。」
嘩，每日有數百個內地旅行團，成千上萬同胞跟團訪港，即係日日都有數以千計內地客因為購物問題畀惡導遊「問候」，擺明趕客啫。其實，呢啲情況行內行外人人都知，政府竟然詐傻扮懵，乜都唔做，咁搞法，香港呢個「好客之都」，有乜理由唔變「趕客之都」吖？
講開又講，惡導遊固然可恨，但歸根究柢都係嗰啲以假亂真、以次充好、平貨貴賣嘅無良黑店惹禍，佢哋根本就係同惡導遊串通嘅「共生架構」。弊在當局打擊不力，變相縱容，黑店愈開愈多，愈劏愈狼。○七年，央視記者來港放蛇，揭發本港黑店宰客手法，中港輿論嘩然，「購物天堂」喺同胞眼中變為「劏客地獄」。港府曾經賊過興兵，係咁意掃咗一輪，但最終又係不了了之，繼續放縱，唔怪得黑店愈嚟愈猖狂。
旅遊業呢鋪畀惡導遊玩到殘，旅遊業議會為咗補鑊，話會搵港區人大代表向內地反映業界苦況喎。講真，旅遊業頻頻傳出劏客、趕客醜聞，始終都係香港自己嘅事，係當局監管失職種落嘅惡果，正所謂解鈴還須繫鈴人，如果港府自己唔做嘢，咪講話搵人大代表，就算搵中央打救都冇用。
出外旅遊買「手信」係人之常情，香港人跟團去外國旅遊，一樣會周圍購物，但從來冇聽過港人喺其他地方因為唔買嘢或者買得少，畀導遊鬧，同埋畀人威脅冇飯食，冇酒店住，搞到要流落街頭，甚至連命都冇埋。點解？計功夫茶話齋，答案一字咁淺，人哋政府有承擔、有做嘢、有監管，唔會容許「母夜叉」為所欲為囉！