嘩嘩嘩！講大話原來真係唔使眨眼o架！淫賤黎旗下壹淫媒居然吹水唔抹嘴，自稱爛果報讀者人數「超越主要競爭對手」，升至全港第一喎。咁嘅彌天大謊都噏得出，功夫茶懷疑淫賤黎下次可能會講，爛果報銷量冠絕外太空！
雖然純屬老作自吹自擂，不過作賊必定心虛，事關爛果報淨係敢吹水「超越主要競爭對手」，冇勇氣直接話超越邊個對手。冇辦法，呢家嘢叫做名不正則言不順，作大吖嘛，吹水唔抹嘴吖嘛，梗係唔敢肆無忌憚啦。
不如咁，等功夫茶為大家展示真金不怕洪爐火嘅數據。根據國際四大市場研究公司之一嘅Oracle Added Value最新調查，《東方日報》連續三十四年高踞全港銷量第一寶座，王者地位絲毫無損之餘，讀者更加激升百分之十三，人數超過三百四十四萬，比爛果報多八十七萬幾，拋離足足一條街。
至於「衝破黎明、再起革命」嘅《太陽報》，強勢穩佔香港第三大中文報位置，讀者人數接近一百三十萬，比○八年激升百分之二十八。即係咁，大家可以做一條簡單算術題，《東方日報》加《太陽報》讀者總人數係幾多呀？冇錯嘞，答案係接近四百七十四萬。兩報聯手打造報壇傳奇，讀者人數比爛果報多二百一十幾萬！
睇番淫賤黎點樣呃鬼食豆腐吖，爛果報所謂「讀者人數全港第一」原來係咁嘅，睇報紙同上網炒埋一碟，只要係咁意瀏覽過網站就當係讀者。喂，係人都知網絡世界虛無縹緲，所得數據難以作實，如果將網民計算在內，功夫茶夠可以拍心口話《東方日報》讀者過億啦！
當然，東方報業集團一定唔會胡亂篤數，唔似得爛果報講到天花龍鳳，每一個數字都係有根有據嘅。吖，差啲唔記得介紹，Oracle Added Value係鼎鼎大名嘅業界精英，擁有權威嘅江湖地位，客戶包括滙豐銀行以及可口可樂等等國際性大企業。資料來源既然係Oracle Added Value，鐵證如山說明《東方日報》銷量第一讀者最多，你話嘞，爛果報有乜可能唔係講大話？
計功夫茶話齋，爛果報係就係第一，不過唔係靠讀者人數，而係靠噏得就噏，絕對係吹水第一。如果有一個講大話比賽，淫賊黎簡直天下無敵，淨係一單自編自導呃讀者嘅陳健康事件已經令人甘拜下風啦！
總而言之，東方紅，太陽升，《東方日報》銷量始終第一，王者飛躍，再闖高峰；《太陽報》穩佔強勢第三位，無疑係尊貴客戶宣傳推廣嘅信心首選。假如尊貴客戶識得搵兩報齊齊落廣告咁又點呢？呢條簡單算術好易計嘅啫，兩報聯手，誰與爭鋒，廣告訊息鋪天蓋地無遠弗屆！
或者有人真係會問，外太空報章銷量邊個係冠軍呀？關於呢家嘢，功夫茶推薦閣下直接去問淫賤黎，應該可以得到一個亂噏到連外星人都Ｏ晒嘴嘅騎呢答案。