決戰六二三 走鬼要執生

因乜事幹中環會塞爆嘅呢？事關今日立法會投票決定政改方案是否通過，史稱「決戰六二三」，難免出現大量「港產草泥馬」包圍尊貴議員。你知啦，上次反高鐵反到四面楚歌，胡椒噴霧慷慨解囊武力鎮壓，今次反政改亦有機會反到七國咁亂，到時咯喎，唔塞至奇。

立法會裏面舌劍唇槍討論政改方案固然十分熱鬧，不過，點都唔夠立法會外面扣人心弦。點解咁講呢？道理其實好簡單，民主黨提出嘅「一人二票區議會方案」得到各界認同吖嘛，所以唔會投反對票，即係否決機會變得微乎其微，場面火極有限。之但係咁，民主黨今次做咗激進死硬派嘅眼中釘，忽然之間變咗「出賣民主」同「投奔中共」嘅牛鬼蛇神，立法會外面相信唔少人係要反民主黨。換言之，協助曾蔭權「起錨」嘅民主黨難以避免「拋錨」，話唔定風水輪流轉，上次反高鐵慘遭圍困嘅係運輸及房屋局局長鄭汝樺，今次插翼難飛嘅可能係民主黨議員。

計功夫茶話齋，今日決戰六二三有三點值得關注。第一點：煩請示威群眾盡量克制，抗議還抗議，唔好再做出過激行為，畀人叫做「暴徒」就唔好聽啦。第二點，煩請警務人員保持冷靜，維穩還維穩，唔好再耍出鐵腕神拳，畀人叫做「公安」就醜死怪啦。至於第三點咯喎，呢個非常重要，關乎香港體面，功夫茶強烈呼籲與會人士及早準備「走鬼時間表」以及「逃亡路線圖」，尤其係特區高官同埋民主黨，開完會即刻走夾唔抖。喂，民主黨議員被困立法會已經冇面啦，如果一不小心走唔甩嗰個係乜司長物局長，成何體統呀！

吖，話時話，曾蔭權擘大喉嚨嗌「起錨」，算唔算先見之明呢？「起錨」另一個解釋係「着草」，或者佢一早預見會有今日包圍立法會嘅場面，所以一語雙關嚟個溫馨提示。

講真，呢鋪確係考驗警方嘅應變能力，軟又唔可以太軟，硬又唔可以太硬。太軟咯喎，好似世界盃球迷衝入英格蘭更衣室破口大罵就唔好啦。太硬咯喎，好似泰國警方出動衝鋒槍實彈射擊示威者就肉酸啦。

講開世界盃，功夫茶提提大家，今晚十點上演英格蘭決戰斯洛文尼亞，港產粉絲多到無倫嘅英格蘭理論上仲有一線生機，絕處逢生都未定。之所以要提到呢個「開波時間表」，無非係想同大家講，示威完就算喇，唔好玩到咁大，平平安安返屋企睇波好過啦。

葉問話齋，分勝負重要吖，定係同屋企人食飯重要？政改方案誰勝誰負，一切按照遊戲規則辦事，辦完事，返屋企。總而言之，決戰六二三，走鬼要執生，記住盡量唔好阻住人哋今晚嘅「睇波路線圖」。