俗語話，螻蟻尚且偷生。人嘅生命只有一次，如果遇到挫折就輕易放棄生命，絕對係愚蠢嘅行為，而當一個社會愈來愈多呢種愚蠢嘅行為，就表示呢個社會一定出咗問題。
撒瑪利亞防止自殺會熱線舊年接獲超過一萬五千求助個案，平均每日四十幾宗。該會分析所得，本港去年自殺率為十四點四五，即每十萬人就有超過十四人自殺，都咪話唔得人驚。
更得人驚嘅係，今年全港已經發生咗十一宗攜同他人尋死嘅「自殺及他殺」個案，講白啲，就係「攬住子女一齊死」。呢，上個月底東涌逸東邨有個媽咪攬住四歲幼女一齊墮樓，母死女重傷，死者懷疑因為不堪生活壓力而走上絕路。當局事後嘅回應，一句涉事家庭不屬求助個案，死者亦冇精神病求診紀錄，就想置身事外，關人個關，真係冷血到冇朋友。查實，呢個家庭經常家嘈屋閉，證實早已經出咗問題，社署淨係識得被動等人求助，唔出事至奇。
講真，呢類早有問題又冇公開求助嘅隱蔽家庭絕對唔係少數，政府一味縮骨，唔肯增加資源主動向呢啲家庭提供協助，唔怪得倫常慘劇不絕如縷。○四年天水圍一名無業漢斬死妻子及兩名年幼女兒，然後自殺，事件震驚全港。高官事後輪住入天水圍做騷，又承諾呢樣，又承諾嗰樣，但最後咪又係不了了之。
自殺率急升敲響警鐘，除咗倫常慘劇，連唔少天真無邪嘅青少年亦要生要死。防止自殺會分析過死因庭舊年處理嘅千幾宗自殺個案，發現十歲至十九歲組別嘅數字比○五年急升咗四成三，增幅遠高過其他年齡組別。
唉，少年不識愁滋味，十幾歲本來無憂無慮，豆芽夢都未發完就覺得生無可戀，呢個唔止係青少年嘅悲哀，直頭係成個社會嘅悲哀。呢，淨係呢個月，已經有多名中學生跳樓自殺。青少年尋短見不外乎學業、感情、同學之間關係等等問題，呢啲唔係乜嘢大不了嘅事，點解搞到非死不可呢？
正如防止自殺會負責人話齋，年輕人要提高紓緩情緒嘅能力，希望家長畀佢哋更多關懷，學校亦唔應該只側重學業成績。之前亦有關注團體指出，時下青少年鍾意上網，社交網絡有限，容易將挫折後果放大，自我形象低，抗逆能力差，唔識珍惜生命。
專家就講得啱喇，教導青少年樹立正確人生觀，增強抗逆力，學校同家庭固然有責任，政府更加責無旁貸。弊在本港教育政策朝令夕改，搞到師生同家長無所適從，教改得個亂字，連唔少教師都因為不堪壓力要跳樓。教育政策誤人子弟，點可能培養出心智成熟嘅學生吖？
歸根究柢，港府施政乏善可陳，搞到社會烏煙瘴氣，亂象叢生，和諧社會得個吉，乜嘢事都有可能發生喇！