老鼠出沒注意！呢次咬人嘅唔係坑渠老鼠，而係死剩把口嘅政壇老鼠。講起呢隻政壇老鼠就巴閉咯，佢咬完國家咬香港，咬完香港咬政黨，簡直仲臭過坑渠老鼠。佢係邊個？咪就係人稱「漢奸」嘅李柱銘咯！
話說李漢奸因為同白鴿黨狗咬狗骨，一早就話要退黨，但退到依家仲未有任何動作。尋日，佢又舊事重提，話要同黨內外友好研究至決定退唔退喎。喂，當初白鴿黨轉軚準備支持政改方案，李漢奸已經威脅要退黨；到白鴿黨開大會正式通過支持政改方案，佢就即時縮沙，話要去番邦「冷靜」一段時間至決定；依家冷靜完返嚟，依然唔見佢退黨。唉，出爾反爾、反口覆舌嘅人就見得多，但好似李漢奸咁扭扭擰擰嘅老而不就聞所未聞，見所未見，佢簡直係人辦之中嘅人辦！
你李漢奸係乜誰呀？你不過係一個過氣政客，係一塊舊電池嘅咋，有幾多斤両，有幾矜貴呀？要退咪退囉，講聲唔玩有幾難啫，使唔使研究嚟研究去呀？話退又唔退，扮晒魚蝦蟹，就算你唔嫌煩，市民早已經厭到嘔，收皮罷啦！
正所謂，老而不死是為賊，老而不退是為妖。李漢奸除咗扭扭擰擰跳草裙舞之外，仲繼續發揮反骨仔本性，猛咁唱衰白鴿黨。佢話喎，白鴿黨太過注重民調同選票，好似變咗「民調黨」咁；又話白鴿黨行緊嘅路線愈來愈似建制派，因為佢從來未見過白鴿黨好似依家咁讚到政府上天，甚至連民建聯都追唔上添。嘩，將自己有份創立嘅黨貶到一錢不值，直頭係反轉豬肚，仲恐怖過《三國演義》入面嗰個反骨仔魏延。
你話嘞，政黨唔注重民意同選票，注重乜嘢呀？唔通齊齊好似李漢奸咁，出賣國家出賣民族就可以攞到選票咩？李漢奸一日到黑「民主」不離口，其實佢連民主嘅ＡＢＣ都唔識，簡直係九唔搭八。
李漢奸亂吠亂咬，搞到白鴿黨主席何俊仁忍無可忍，第一時間出嚟反駁，佢話睇唔到依家有邊個政黨唔睇民意去做嘢，仲反問李漢奸究竟聽到白鴿黨邊句係讚政府嘅。又唔怪得何俊仁咁嘅，李漢奸吃裏扒外，唔就假。其實，道不同不相為謀，李漢奸長期唱衰自己黨，早已經係白鴿黨負資產，與其等黨奸自己消失，白鴿黨不如主動清理門戶，消除後患好過啦。
講開又講，李漢奸話退又唔退，其實係有苦衷嘅。佢家陣又唔係立法會議員，又唔係黨主席，個朵又一早臭晒，得番白鴿黨呢個最後嘅政治舞台，如果連呢個舞台都冇埋，仲邊有存在價值呀？普通舊電池就話可以送去堆填區啫，佢呢塊又毒又臭嘅政治舊電池送得去邊吖？
當然，如果李漢奸真係畀白鴿黨掃出門口，失去呢個政治舞台，佢仲有一條路行，就係更加死心塌地做洋走狗，到時咯喎，佢咪可以名正言順咁日日做漢奸囉！