係人都知，有生必有一死；同樣係人都知，中國人社會最忌提到一個死字。大文豪魯迅講過一個小故事，有人為小寶寶擺滿月酒，賓客自然善頌善禱好話講盡，呢個話小寶寶日後一定做大官，嗰個話小寶寶長大必然發大財，只有一個講出真心話，小寶寶將來係會死嘅。當然，忠言逆耳吖嘛，講真話嗰個誠實豆沙包激到主人家七竅生煙。
冇錯，人人將來都會死，正如跑馬地墳場名言，今夕吾軀歸故土，他朝君體也相同。既然係咁，點解中國人又咁忌諱死亡呢？關於呢個問題，功夫茶暫時唔識答，淨係知道一個現象，由於死係禁忌，所以不得善終！
嗱嗱嗱，大家唔好以為功夫茶亂講呀，有數據為證o架。英國《經濟學人》雜誌最近審視全球四十個國家及地區嘅善終服務質素，公布一項善終指數，以最低一分至最高十分排名，英國以七點九分位列榜首，即係善終服務全球第一，可以稱得上「終極天堂」。排第四十名敬陪末席嘅係印度，僅得一點九分。至於大家最關心嘅香港，得分五點三，位列二十。
好嘞，大家可能會話，香港嘅善終服務排名二十都算合格吖，始終叫做不過不失。之不過問題係，作為香港長期競爭對手嘅新加坡，人哋排名十八呀。台灣又點？排名十四呀。亦即係話，香港嘅善終服務遠遠落後形勢！
咦咦咦，咪住先，講到競爭對手，新加坡喺另一方面又贏香港。中國社科院公布最新全球城市綜合競爭力排名，頭三位依次係美國紐約、英國倫敦以及日本東京。社科院就話嘞，歐美城市仍然處於最高位置，反映金融海嘯對全球競爭力嘅影響較預期為小。香港人當然最關心香港排名啦，唔好意思，只係排第十位啫，比排第八位嘅新加坡低兩級。
轉頭又講番善終服務吖，香港排名唔能夠處於高位，其中一大原因絕對同忌諱死亡有關。喂，你連個死字都唔敢講，試問又有乜可能切切實實做好善終服務迎接必然大駕光臨嘅死亡使者？為人子女怕為父母安排身後事等於「詛咒老竇老母早死」吖嘛，所以就唔會做好應有嘅準備嘞。即使特區政府，同樣忌諱談死，完全冇提供任何宣傳教育，搞到市民大眾名副其實「冇有識死」。
所謂善終服務，其實分開兩個層次，第一個層次係臨死，第二個層次係已死。撇開臨死部分唔講，已死部分正正係香港家陣面對嘅一大難題。喂，骨灰龕位奇缺無比，小市民死無葬身之地呀大老爺！
骨灰龕問題困擾咗香港人好多年，公眾龕位供應量基本上係零，私家龕位呢，由於政府長期闊佬懶理兼夾監管不力，卒之搞到亂七八糟，一個二個非法經營，呢個大發死人財，嗰個生人霸死地。問題嚴重到有人上街示威，都算得上係全球罕見嘅千古奇聞咯。
食衞局局長周一嶽係就係鑑於問題嚴重而推出諮詢方案，睇下點樣搞得掂骨灰龕，之但係，所謂諮詢竟然拖得就拖，拖到周局長任期結束都未必有解決辦法。
咁即係點呀？即係話，競爭力落後形勢，官逼民不得善終，功夫茶祝大家長命百歲，一定要同政府鬥長命，直至有優質善終服務為止！