好多人鍾意養寵物，貓貓狗狗雀仔烏龜乜都有，曾蔭權更加係錦鯉專家，大家知唔知其實魔鬼都鍾意養寵物？如果唔知，話過你知，魔鬼寵物就係人見人怕嘅老鼠，每逢現身總會有男女老幼自動配上驚呼狂叫嘅背景音效。
魔鬼之所以養老鼠，原因係老鼠屬於「動物界大殺傷力武器」，中世紀一場屍橫遍野嘅黑死病，罪魁禍首正正就係散播病毒嘅老鼠。所以咯喎，老鼠又可以叫做地獄使者。
既然老鼠咁得人驚，係咪應該趕盡殺絕呀？冇錯，應該。不過可惜吖，香港鼠患極之嚴重，嚴重到……嗱嗱嗱，藍田又有老鼠當街當巷咬傷人！
尋日喎，有一位三十零歲女子抱住一歲Ｂ仔去到藍田啟田大廈地下太平街市買餸，正在聚精會神揀生果嘅時候，忽然之間，右腳刺痛，低頭一望，嘩嘩嘩！老鼠呀！好大隻老鼠呀！十吋長嘅魔鬼寵物呀！
咦，咪住先，相信大家記憶猶新，香港心臟地帶中環畢打里曾經發生過巨鼠咬傷英國女遊客事件，醜到國際揚名，乜食環署唔係應該洗心革面做好滅鼠工作嘅咩？點解仍然任由魔鬼寵物橫行無忌亂咬市民？
其實，睇睇藍田發生老鼠咬人事件之後食環署做過乜嘢補鑊工夫，自然就會明白老鼠點解咁猖獗。呢嗱，食環署淨係向街坊派發滅鼠宣傳單張，唔見放餌捉老鼠。有姿勢冇實際成咁，老鼠見到都偷笑啦！
計功夫茶話齋，不如搵人設計另一款宣傳單張，內容雞乸咁大粒字寫上：通緝鼠患元兇！
邊個係鼠患元兇呢？功夫茶講你未必信，不如聽聽有「廣州鼠王」之稱嘅李鏡就娓娓道來。李鏡就去過中環畢打里老鼠咬傷遊客嘅現場視察，得出一個結論，食環署滅鼠不力，包括清潔失敗、落藥失敗、監管失敗、跟進失敗以及堵截失敗等等，所以特區政府先至係鼠患之源！
即係咁，你對敵人仁慈，等於對自己殘忍，食環署滅鼠不力等於縱容魔鬼寵物散播病毒，香港假如又整一鑊黑死病，曾蔭權政府集體腳痛落台十次都唔夠賠罪啦！
講到呢度，有一則消息相當過癮。青藏高原東北邊緣嘅甘肅省甘南藏族自治州，有一種叫做中華鼢鼠嘅鼠輩動物危害草原生態，利用毒藥滅鼠又怕造成環境污染，於是乎，當地政府諗出一條非常原始但係又十分有效嘅計仔，就係採用人手弓箭捕殺，滅鼠一隻賞錢三元。嗖一箭，殺一隻；嗖兩箭，殺一雙；嗖嗖嗖嗖嗖嗖嗖，至今滅鼠九萬隻。
不如咁啦，身為鼠患元兇嘅食環署署長卓永興，如果希望戴罪立功，可以勤練射箭技術，然後組成神射手弓箭隊全港大搜查。不過千祈要記住喎，淨係射老鼠好喇，唔好傻更更發雞盲誤中街坊，否則又要搵人設計多一張宣傳單張：通緝傻瓜射手！