真頂癮，政府又以加強監管為名，財經事務及庫務局局長陳家強建議成立獨立保險業監管局，之但係，羊毛出在羊身上，每年二億四千萬開支要從投保人保費徵收最多百分之零點一。未入正題之前，功夫茶先同大家講講點解咁頂癮。
特區政府管治模式其實來來去去千篇一律，只要你喺香港生活一段時間，你基本上就可以掌握到萬變不離其宗嘅官場動脈。即係話，你預測官老爺下一步行動隨時準過神算八爪魚保羅，真係非常極之頂癮㗎！
管治模式係點嘅呢？簡單咁講，但凡有乜鬼問題發生，政府就會左研究右研究，然後疊床架屋額外整多個部門出嚟，美其名係加強監管，實際上係攤薄責任。不如舉幾個實際例子啦——
嗱，沙士疫情嚴重吖嘛，額外整個全城清潔策劃小組；貧富懸殊問題嚴重吖嘛，額外整個扶貧委員會；金融海嘯問題嚴重吖嘛，額外整個經濟機遇委員會；樹倒人亡問題嚴重吖嘛，額外整個樹木管理辦事處……
大家千祈唔好忘記，乜嘢清潔呀，乜嘢扶貧呀，各種各樣嘅工作根本就係政府既有責任，唔通冇咗全城清潔策劃小組，食環署就唔使掃街倒垃圾咩？更加搵笨嘅係，疊床架屋額外整出嚟嘅部門通常係廢嘅，好似樹木辦咁吖，成立之後繼續死人冧樹，廢到冇朋友。
好嘞，睇番最新呢個偉大建議，成立獨立保險業監管局嘅原因當然又係保險業界問題多多啦，特別係汽車保險連番加價引發營運者抗議，要求當局監管。之但係咁，成立還成立，有冇意義先？其實現時監管部門唔少㗎，又有保險業監理處，又有保險代理登記委員會等等，大寶號多到噏都噏唔晒。計功夫茶話齋，與其話有必要額外成立新部門加強監管，不如話原有嘅舊部門表現失職。就好似當年曾蔭權要捋起衫袖親自掃街執垃圾咁吖，呢家嘢唔係叫做煲呔曾英明神武，只不過食環署搞衞生失敗。
綽號傻強嘅陳家強其實一啲都唔傻，依足官場慣例成立額外部門固然係政治正確嘅為官之道，更加蠱惑嘅係，傻強仲識得打荷包掠水！
喂喂喂，監管保險業本來就係政府既有責任，即使真係加強監管，係咪應該用公帑埋單先至啱數？家陣唔係喎，傻強居然向投保人開刀，將開支轉嫁消費者，蠱惑嘴臉盡覽無遺。
交完稅得唔到應有服務，已經係搵笨，然後以改善服務為名再掠水，即係雙重搵笨。打個譬喻吖，納稅人每年奉獻血汗錢畀公務員出糧，望都係望曾蔭權政府做好呢份工啫，萬一施政失敗天怒人怨，必須勞煩中央政府出手「加強監管」，唔通納稅人又要向阿爺交多一次稅呀？
所以咯喎，呢個所謂保監局，又係特區政府另一搵笨傑作，傻強真係唔傻㗎，有資格改名叫做奸強！