未入正題之前，功夫茶先同大家溫故知新。記唔記得幾年前有一單非常搞笑又十分氣頂嘅「晾衫風波」？將軍澳喎，有好多街坊趁陽光普照將大量衫褲鞋襪晾出街邊，當然少不免曬棉胎，晾到行人路七國咁亂，欄杆掛滿萬國旗，嚴重有礙觀瞻。
既然公眾地方隨處晾曬有損市容，政府梗係應該取締啦，誰不知五個衙門你推我讓，冇人願意執法。卒之驚動申訴專員公署，一怒之下將問題直接提交當時尚未御賜升職機會嘅政務司司長曾蔭權。堂堂一個曾司長，竟然要落手落腳親自處理街邊晾衫咁雞毛蒜皮嘅小事，反映特區政府烏厘單刀。
好嘞，言歸正傳，今日功夫茶到底想講乜呢？即係咁，想講嘅係情節類同嘅問題，一樣有礙觀瞻，亦係有損市容：手推車掛滿行人路欄杆。
胡亂擺放手推車嘅問題有幾嚴重？以中環為例吖，皇后大道中、德輔道中、畢打街、干諾道中等等，總之有欄杆嘅行人路就會發現手推車，估計整個中環掛咗超過二百部。其中皇后大道中係重災區，短短三百米行人路兩旁，欄杆掛滿八十部手推車，部分甚至玩疊羅漢。
大家唔好以為手推車胡亂擺放只係肉酸難睇咁簡單，其實仲有相當大嘅危險性。你知啦，手推車嘅主要構成部分係生銹鐵，一個唔覺意，路人甲勾爛條裙，路人乙撞傷隻腳，路人丙甚至乎仆崩個鼻，更加恐怖嘅係生銹鐵刮到你破傷風，咁就弊傢伙咯！
中環以外有冇相似情況呢？梗係有啦，而且多到連遊客區都淪陷，請恕功夫茶唔同大家囉囌。
眼見手推車阻街成災，政府嘅反應又係老模老樣。食環署職工權益工會副主席李美笑話喎，該署本來可以按照《簡易程序治罪條例》嘅「阻街」以及《公眾衞生及市政條例》嘅「阻礙清潔街道」兩條法例條文處理，之但係，食環署曾經引用「阻礙清潔街道」條例控告一名將手推車擱於欄杆嘅人，結果被法官駁回。於是乎，食環署順水推舟借勢縮骨，聲稱較合適嘅條例應該係《土地（雜項條文）條例》嘅「非法佔用政府土地」條文，相關執法部門係地政總署。
食環署大腳交波，地政總署又點接波？其實官僚作風呢家嘢，好易估嘅啫，地政總署梗係詐傻扮懵啦，話欄杆上嘅手推車唔係佢哋執法範圍喎。總而言之，一個二個懶骨頭官僚漠視手推車摧毀市容，呆頭呆腦放之任之。
計功夫茶話齋，敷衍塞責由始至終都係官場陋習，你要求各大衙門自我改善簡直就係緣木求魚，不如咁嘞，援引「晾衫風波」先例，再次由申訴專員公署發功，再次直接將問題提交政務司司長，再次將雞毛蒜皮小事呈報最高管理層。萬一當今司長唐英年又係呆頭呆腦搞唔掂，咁咪再上一層樓交畀曾蔭權處理囉。話時話，煲呔曾都係做唔慣大事㗎嘞，反正掃街搞清潔起家，掃蕩手推車呢種小事如無意外駕輕就熟。