左！右！左右左！相信每個幼稚園學生都會經過呢種低Ｂ班訓練，由老師教導何謂左、何謂右，等小朋友唔好左右不分吖嘛。哈，唔知係幼稚園太失敗定係學生哥太低Ｂ，好多傻仔傻妹長大成人之後依然左右不分，譬如話，烏龍醫生。
大家可能會問，咦，功夫茶係咪講緊東區醫院嗰一單離晒大譜嘅醫療失誤？冇錯，就係嗰單，之不過咁，未入正題之前不妨先睇睇台灣另一單個案。
今年六月，台灣有個二十六歲哥哥仔喎，打籃球導致右腳受傷，走去桃園縣林口長庚醫院求醫啦。一個實習醫師問：「開左腳嗎？」病人大嚇一跳，急忙提醒對方：「不是左腳，是右腳！」實習醫師於是喺右腳做記號。翌日，病人為免無辜辜開錯刀，向醫護人員千叮囑萬叮嚀，右腳受傷，唔係左腳。醫護人員滿口答應，點不知，操刀醫生仍然擺烏龍，一刀割落左腳！
左右不分，一錯到底，問你服未？台灣係咁，原來香港都係咁。
講番東區醫院嘞，情節簡直係百分百翻版。有個二十一歲裝修工人扭傷右腳，走去東區醫院求醫啦。手術之前護士其實已經喺右腳膝部畫下記號，麻醉科醫生亦確認做右腳手術。點不知，主診醫生傻頭傻腦低Ｂ過幼稚園學生，最後竟然喺左腳落刀！
唉，左右不分即係迷失方向，呢個烏龍醫生希望唔係以私家車代步嘅司機啦，盲舂舂橫衝直撞危害途人安全㗎。至於東區醫院，可以考慮改名西區醫院，反正左右不分，索性東西對調。
明明右腳受傷，結果左腳開刀，毫無疑問錯到離晒大譜。更加荒謬嘅係，烏龍醫生居然惡人先告狀質問病人：「你之前同我講，話左腳有問題嗰喎！」
功夫茶唔知好嬲定好笑，即使病人真係講錯，唔通醫生唔使檢查就確信不疑？舉一個例子吖，有個中央肥胖嘅男人肚痛求醫，口快快噏咗「大肚」，莫非醫生應該即刻將一條麻甩佬送入產科病房處理？唔好玩啦，男女不分仲大鑊過左右不分㗎！
話時話，香港嘅公立醫院擺烏龍都唔知係第幾次咯，有時係左右不分，有時係調亂身份，有時係亂咁打針，總而言之害死病人。到底有冇辦法防止類似事件無日無之繼續發生？計功夫茶話齋，其實最需要開刀嘅係「癌症上腦」嘅醫療系統，只要對症下藥開一刀，未必起死回生，起碼唔好畀癌細胞擴散吖嘛。
一錯再錯，錯完又錯，好明顯係醫療系統癌上腦徵狀，開腦切除腫瘤萬事大吉。如果大家唔明，不如再講白啲。喂，立法會冇耐之前先至譴責過醫療孖寶兄弟失職，一個係衞生署署長林秉恩，一個係食衞局局長周一嶽，呢兩個咪就係醫療系統癌上腦腫瘤囉，切啦唔該！