特區護照「升呢」，免簽證國家愈來愈多，身為港人，唔止出外旅遊方便咗，簡直引以為榮添吖。呢，有亞洲首富國家之稱嘅汶萊亦向港人送秋波，給予特區護照免簽證待遇啦。
本來呢，有國家向港人提供免簽證待遇，港府應該立即公布，既可以令市民第一時間知道，亦係對有關國家嘅尊重，在情在理在禮貌上，都冇拖延嘅理由。但奇怪嘅係，汶萊上個月起給予香港特區護照持有人十四日免簽證入境，本港入境處事隔一個月都未公布有關安排，搞到汶萊駐港總領事館不時接到港人嘅查詢。
查實，本港多間旅行社上個月已經由汶萊領事館獲知有關安排，但入境處網頁依家都未更新有關訊息。當局回應本報查詢時，亦冇承認特區護照已經獲得免簽證待遇，只係話收到汶萊領事館正式通知後至會盡快公布喎。唔怪得有人懷疑，近排當局掛住起錨，可能根本唔知汶萊畀港人免簽證待遇。
外國畀得港人免簽證，梗係希望盡快吸引多啲遊客啦，港府拖足成個月乜都冇做，淨係被動等通知，唔止對汶萊政府唔尊重，直情係倒人哋米，你話係咪失禮吖。
據講，當局唔肯表態證實有關安排，係因為未簽署正式文件，冇白紙黑字做「保障」，擔心好似兩年前咁，喺未接獲巴西方面正式通知前，就公布兩地互免簽證已生效，搞到有港人幾乎吃閉門羹咁滯，當局直頭瘀到痹。
唉，一朝被蛇咬，十年怕草繩。當局未做嘢先驚衰，無非係怕孭鑊啫。其實，汶萊總領事館早已經貼出畀特區護照入境免簽證待遇嘅告示，正如職員話齋，貼得張紙出嚟，已經證實咗啦。按照港府嘅邏輯，唔通要等到汶萊領事館喺報紙電視賣埋廣告，咁先至可以作準？
再講啦，政府網頁所列給予特區護照免簽證待遇國家名單入面，註明旅客抵達呢啲國家時，仍須經當地出入境機關嘅最後同意，方可入境，即係話對方隨時有權拒絕，同免簽證無關，港府到底驚乜？
仲有吖，唔少免簽證國家後面都有加註，指出遊客需要留意嘅事項。港府大可以將汶萊個名加入名單，再註明雖然未簽署正式協議，但免簽證待遇已經生效，咁樣市民又清楚，汶萊方面又滿意，咪搞掂咯。唉，連咁簡單嘅事都唔肯做，唔怪得人哋話呢班官僚唔踢唔郁啦。
中國係禮儀之邦，普通市民失禮無傷大雅，港府失禮失到海外，唔止丟架，甚至可能付上政治代價添。正如學者話齋，人哋表現出良好意願畀特區護照免簽證，港府遲遲未有行動，又唔公布有關安排，只會令對方國家生疑，如果處理得唔好，可能觸發外交政治小風波。
計功夫茶話齋，呢個政府思維僵化，大事做唔到，小事又唔做，淨係識得按本子辦事，旨意佢哋帶領香港走向世界，直情諗都唔使諗。