夏日炎炎正好「潛」，下亞厘畢道近排水盡鵝飛，官員一個二個玩潛水隱晒形。又係嘅，政改方案起咗錨，立法會亦收爐抖暑，高官平時已經懶懶閒，家陣朝中無大事，就算個人開緊工，個心早已經放咗假啦。
不過，有位問責局長就冇咁好彩啦，忙到抽筋不特止，大熱天時仲要被迫「焗桑拿」。邊個玩得咁激？咪就係近排畀人問候得最多嘅環境局局長邱騰華囉。冇計啦，鬼叫佢成個「惹火尤物」咁，唔引火燒身都幾難。
呢，話口未完又有火頭。尋日有近兩百名市民踩上長沙灣政府合署，抗議當局卸責，冇好好保護環境，搞到大浪西灣郊野公園畀人掘成爛地，嚴重破壞自然生態環境。
又難怪市民咁慶嘅，大浪西灣唔止係著名生態旅遊景點，更有香港後花園之稱，近排有人大肆掘地斬樹，搞到成個瘌痢頭咁，邱騰華身為問責局長，居然對呢件事一無所知，甚至連現場喺邊都確定唔到，你話係咪抵鬧吖。正如有市民話齋，邱騰華淨係識叫人停車熄匙，但對於有人破壞自然環境就冇晒符，唔止廢廢地，簡直係超廢。
講到停車熄匙，原來邱騰華又有新搞作啦。自從港府建議推行呢項擾民惡政以來，反對聲音未停過，運輸業界反彈尤其激烈，的士、小巴等搵食司機一直要求豁免，仲要求環境局高官喺高溫天氣下試吓停車熄匙嘅滋味。
點知高官好似借咗聾耳陳隻耳咁，詐聽唔到。直至月初有位年過八旬嘅小巴司機因為響應當局停車熄匙嘅呼籲，搞到當場焗暈，最終不治，輿論嘩然，邱騰華見眾怒難犯，避無可避，先至答應嘗試吓焗桑拿嘅滋味。
環境局呢場焗桑拿嘅大龍鳳明日上演，由中午一點至下午五點十分，從上環港澳碼頭巴士總站開始，跟住到銅鑼灣、紅磡、旺角及藍田等，做戲做到足。聽講邱騰華仲會親自上陣，進入小巴同的士車廂乾蒸，可惜佢冇交代會蒸幾耐，以佢咁身嬌肉貴，可能係咁意做吓戲，影張相就算，大家千祈唔好當真。
不過講番轉頭，邱騰華呢次肯放下身段，親身體驗職業司機嘅苦況，總好過成日坐喺冷氣房閉門造車，點紅點綠，所以，今次雖然係做戲，都有啲睇頭嘅。
問題係，保護環境係一項複雜嘅、長遠嘅系統工程，唔係靠做一、兩場戲就可以搞掂。計功夫茶話齋，邱騰華與其嘥精神搞乜嘢停車熄匙，不如切切實實諗吓點樣做好保護環境嘅整體規劃。如果繼續玩小聰明，耍埋啲花拳綉腿，只會令本港生態環境不斷惡化，空氣更加污濁，到頭來佢自己只會不斷惹火上身，盞攞嚟搞。