有病有痛，梗係睇醫生㗎啦，睇完醫生，梗係啪藥丸㗎啦。咪住，停一停，諗一諗，閣下啪嗰幾粒藥有冇問題嘅先？事關香港藥廠經常出事，百年老字號都可以驗出含有違禁藥材，邋遢山寨廠又居然成行成市，呢頭中藥爆大鑊，嗰頭西藥發藥瘟。假如，食完藥反而小病變大病，大病變冇命，咁就該煨咯！
呢嗱嗱嗱，審計署舊年發表過報告怒批衞生署監管藥物不力，情況有冇改善呢？功夫茶真係答你唔到，你知啦，衞生署署長林秉恩份人好低調，低調到乜都死冚爛冚，好似私家醫院咁吖，即使醫療失誤害死人都唔肯點名公布大寶號，功夫茶完全冇辦法知道監管藥物情況有冇改善。
根據審計報告，監管藥物不力嘅罪狀包括，衞生署多年前已明知不法進口商以轉口證為名在港銷售未註冊藥物，至今未堵塞漏洞；另外，舊年上半年有四成批發商以及四成七進出口商，超過一年時間未被巡查。簡單咁講，發藥瘟嘅原因係衞生署發雞盲，長期是是但但懶懶閒閒。
好嘞，審計署既然有報告，立法會照例要跟進。經過連日聆訊，立法會政府帳目委員會終於得出結論，一致決定譴責署長林秉恩。至於林秉恩老頂食物及衞生局局長周一嶽，同樣走唔甩，帳委會送佢四粒字：極度遺憾。周一嶽都算巴閉咯，做咗香港回歸以來第一個被立法會指名道姓極度遺憾嘅局長級官員。
帳委會主席黃宜弘係咁講嘅，譴責衞生署署長係相當嚴厲嘅批評，主要由於林秉恩同時犯上多項錯誤，巿民健康冇保障。既然如此，林秉恩係咪有需要問責落台呢？黃宜弘就話嘞，帳委會唔會主動要求官員落台，相信政府會自行決定。
唉，計功夫茶話齋，極度遺憾周一嶽又好，譴責林秉恩都好，冇鬼用㗎。知唔知港產官僚最耍家係乜？練成厚臉皮撒賴神功囉。就好似周一嶽咁吖，花名有得你叫周一鑊，即係孭完一鑊又一鑊，你幾時見過一鑊哥哥知錯能改吖？咪又係依然故我。講到林秉恩咯喎，情況不遑多讓，又係不斷揩大鑊，又係繼續耍賴皮，即使醫療事故死得人多，秉恩哥哥扮到冇一單關佢事。
所以話啫，若然真係想改善藥物監管，有效阻截發藥瘟，唯一辦法係學似足球領隊咁撳掣換人，一次過撤換兩個專擺烏龍嘅沙煲兄弟，吖，講錯，應該係穿煲兄弟。
萬一，曾蔭權政府太忙碌，掛住玩「起錨」玩到冇時間撳掣換人，又或者太仁慈，唔捨得踢走冇功都有勞嘅穿煲兄弟，咁又點呢？輪到功夫茶贈你四粒字：極度保重。冇錯，真係要極極極極極度保重，只要你冇病冇痛，咪唔使睇醫生囉，咪唔使啪藥丸囉，呢個係最有效嘅保障辦法。如果唔係，只要穿煲兄弟一日在位，食錯藥冇嘢好怨，淨係可以怨一句：極度遺憾。