吓？街名涉嫌種族歧視？中西區區議員聯署要求地政總署改名？嘩嘩嘩，真誇張！唉唉唉，太混帳！
涉嫌種族歧視嘅係四條以「摩羅」為名嘅街道，分別係「摩羅上街」、「摩羅下街」、「摩羅廟街」以及「摩羅廟交加街」。聽講喎，有印巴裔人士唔鍾意香港人以「摩羅差」稱呼佢哋，連帶覺得街名叫做「摩羅」含有侮辱成分。於是乎，中西區區議員煞有介事開會討論，其中有份聯署要求改名嘅區議員係咁講嘅：香港既然係國際金融中心，人口包括不同國籍人士，應該更改帶有種族歧視嘅街道名稱。
聽到呢壇嘢，功夫茶簡直Ｏ晒嘴。喂，乜「摩羅」真係有侮辱成分咩？唔該區議員做下功課先啦，根據地政總署解釋，「摩羅」可能源自Morramen，即係來自中東嘅伊斯蘭商旅，亦有人話係源自葡萄牙語Mouro，本來係指中世紀攻佔歐洲西南部嘅北非人，後來泛稱北非人、阿拉伯人、波斯人以及印度人。即係話，呢個名稱冇乜貶意。
好嘞，假設真係有少少政治不正確，唔該各位老爺奶奶大叔大嬸用腦諗下吖，呢幾個街名用咗百幾年，歷史悠久過絕大部分香港建築物，點可以話改就改㗎？莫講話堅決捍衞集體回憶嘅普羅市民唔會贊成，如果你係當地街坊，譬如話住喺摩羅上街，你肯唔肯將自己叫慣叫熟嘅地址改做乜乜物物街吖？唔好玩啦！
其實唔止本地同胞唔贊成，功夫茶相信連外來遊客一樣有意見。你知啦，摩羅街市場係國際聞名嘅古董勝地，旅遊書有介紹，旅發局有推薦，萬一改咗名，遊客搵唔到，咁點算呀？旅遊業嘅經濟損失邊個賠呀？唔通叫摩羅街市場嘅商販包圍中西區區議會抗議咩！
如果話街名有少少政治不正確就要改，咁就大劑嘞，睇怕地政總署好唔得閒，小市民更加係迷失方向陀陀擰。「皇后大道中」政治正確咩？香港都回歸中國十三年咯，仲掛住大英帝國皇后娘娘嘅舊招牌，好多熱血愛國嘅炎黃子孫或者會覺得係種族歧視喎，簡直辱我中華，唔通要改做「共產大道中」？
依照政治正確邏輯，一系列以殖民地時代港督為名嘅街道全部要改。「羅便臣道」改做「毛澤東道」，「軒尼詩道」改做「鄧小平道」。即使唔係以港督為名，總之任何帶有殖民色彩嘅名稱都要改，「太子道」順理成章改做「人民道」，「皇后像廣場」就算唔改做「天安門廣場」，起碼都要改做「解放軍廣場」。
呢嗱嗱嗱，係咪麻煩吖？呢家嘢就係自尋煩惱。計功夫茶話齋，「摩羅」未必係侮辱，反而無風起浪嘅區議員自取其辱，九唔搭八忽然話要改街名喎，等香港納稅人睇清楚乜嘢叫做飽食終日不務正業，浪費公帑嘥米飯！