香港空有一個「樹木管理辦事處」，仍然有樹木砰砰嘭嘭仆落街壓死途人，大家不妨估吓，嗰個「創意香港辦公室」有冇辦法將香港打造成創意之都吖嗱？唔好話功夫茶杞人憂天，創意之都九成冇運行，侵權之都先至有機會，事關特區政府本末倒置，一來唔尊重創作者，二來好縱容侵權者。
唔信？等功夫茶講個古仔畀大家聽。○九年一月三十一日《東方日報》娛樂版刊登一則題為「名店掃新裝／抗拒廣東話／趙薇普通話交流笑晒」嘅報道，圖文並茂㗎，真係好精彩。之但係呢，二○一○年二月二十六日壹淫媒旗下《忽然１周》居然盜用《東方日報》當日嘅圖片。見有賊仔偷嘢，受害人當然捉賊啦，所以東方就發出律師信要求賠償。雖然《忽然１周》滿口歪理狡辯，話相關圖片係來自互聯網喎，唔知東方擁有版權，不過已經向東方賠償二萬元以及支付一萬元律師費，即係默認侵權。
大家可能會問，淫賤黎嘅壹淫媒盜用東方圖文都唔係第一次啦，死性不改呢家嘢冇藥醫嘅，正所謂劣根難除吖嘛，呢個古仔有乜嘢咁特別？單獨一個古仔當然冇乜特別，不過，當你發覺呢個其實係第四十八個古仔，壹淫媒侵犯東方版權已經四十八次，壹淫媒向東方賠償總額已逾三十萬元，而執法部門居然若無其事，一次都冇行動，你就會當堂覺得非常之咁特別。
大家唔好唔記得，侵犯版權係刑事罪行，違例者完全可以收監法辦。既然係刑事罪行，即使受害者自己唔出聲，執法者都應該主動出擊撲滅罪行啦。特別之處就正正喺呢度，東方一次又一次做咗受害者，一次又一次不平則鳴，哈，乜鬼海關呀，乜鬼警方呀，乜鬼廉署呀，甚至乎乜鬼「創意香港辦公室」呀，冇一個有反應去捉賊。所以話啫，創意之都喎，呃鬼食豆腐！
不如咁吖，講多個古仔畀大家聽。○五年三月十五日，有一單譚姓一家四口食咗毒帶子不適送院嘅新聞，其中一張刊登於《東方日報》頭版嘅獨家照片，竟然被《蘋果日報》及其網站等多間傳媒盜用。東方即刻採取法律行動，同時又向警方、海關同埋廉署舉報。由於鐵證如山，包括《蘋果日報》在內嘅有關傳媒一早向東方賠償求和，至於涉案記者高潤添，亦被法庭判處敗訴。既然東方透過民事訴訟打贏官司，即係相關傳媒嘅侵權行為無所遁形，警方、海關以及廉署係咪應該以刑事罪名執法呀？唔好意思，事隔五年，執法部門繼續隻眼開隻眼閉，罪犯仍然逍遙法外。
即係咁，無論淫賤黎嘅壹淫媒係幾咁可惡，如果冇特區政府包庇縱容，係冇可能橫行無忌嘅。大佬，侵權四十八次喎，積犯餐餐都唔使負起刑責喎，如果你話唔係官淫勾結，功夫茶只可以咁講，香港法治已死！