黑店劏人，激死旅客，醜聞愈爆愈多。旅遊事務專員尋日出嚟補鑊，講嚟講去又係三幅被，話唔能夠容忍強迫旅客購物喎。講嘢咩，如果唔係港府「忍功」了得，變相縱容黑店劏客，香港呢個「亞洲盛事之都」點會升呢做「世界黑店天堂」吖？
唔講唔知，呢次捲入事件嘅旅行社，原來本簿已經花晒，仲畀國家旅遊局列入黑名單添。旅遊業議會話，呢間旅行社近年已經有十次違規紀錄，仲多次被罰款處分。議會亦曾收過十宗內地旅客對呢間旅行社嘅投訴，涉及購物、導遊同酒店住宿等。
咁都得？旅行社畀人投訴咁多年，當局居然可以忍足咁多年，如果呢次唔係搞得咁大鑊，咪又係「輕舟已過萬重山」，乜事都冇。違規當食生菜，投訴當耳邊風，好明顯，由於港府將規管責任卸晒畀旅遊業界，現行監管機制形同虛設，毫無阻嚇作用，不良業者根本唔當一回事。
當局話喎，無論事件真相係點，都要將涉事嘅無證導遊搵出嚟。話時話，今次搞出人命，當然要追查到底，但導遊有冇證，其實並唔係問題嘅重點，如果唔打擊違規旅行社同無良黑店，就算搵到個導遊都解決唔到問題㗎。一雞死一雞鳴，只要旅業繼續無王管，黑店繼續存在，旅客權益一樣冇保障，劏客醜聞照樣會發生。
當局又話喎，已經同深圳方面傾掂，除咗互相交換旅行團資料，仲會安排旅客隨團「放蛇」，睇吓有冇強迫購物。而旅遊業議會就指對旅行社已有一套罰則，嚴重違規嘅可以「釘牌」咁話。其實乜都假，堵塞漏洞最緊要，正如立法會議員話齋，當局擬定嘅措施根本冇針對發牌制度嘅漏洞，遏止唔到不良旅行社以一條龍方式劏客。
唉，等呢個政府亡羊補牢，蛇都死啦。查實，家陣唔少內地來港旅行團都以「零團費」甚至「負團費」招徠，導遊冇工資，強迫旅客購物成為佢哋嘅主要收入來源，呢個至係問題癥結所在。即係話每做成一單生意，導遊都可以抽佣，旅客唔購物，佢哋就冇飯開，喺咁嘅情況下，梗係乜鬼古靈精怪、污糟邋遢手段都使晒出嚟啦。
仲有吖，家陣專搵旅客笨嘅黑店愈開愈多，貨不對辦，以次充好，欺詐手段五花八門，匪夷所思，內地同胞入去購物，就好似入咗孫二娘開嘅人肉包子舖咁，任人劏到一頸血。
弊在政府懶得就懶，乜都唔做。前幾年，央視記者放蛇直擊，踢爆本港黑店劏客伎倆，海關、警方至賊過興兵，係威係勢打擊咗一輪，之後就關人個關。黑店改頭換面，由紅磡及土瓜灣開到去西九龍旅遊旺區，轉吓眼又成行成市，唔通政府發雞盲睇唔到咩！
旅行社違規屢禁不止，黑店劏客肆無忌憚，呢次激死旅客事件令本港旅遊業形象一落千丈，衰到貼地。計功夫茶話齋，如果當局唔盡快洗太平地，清除旅遊業嘅陳迹污垢，加強監管，堵塞漏洞，旅遊業呢條香港「經濟支柱」遲早冧得。