正所謂，一樣米養百樣人，呢個世界真係有好多三尖八角嘅怪人。有一種怪人喎，唔知點解好鍾意賣嘢，不過賣嘅唔係普通嘢，而係自己友。好似臭名遠播嘅大漢奸李柱銘咁吖，不斷賣國，經常賣港，最近更加染上一鋪怪癖，就係開口埋口唱衰民主黨，即係賣黨咁解。
係人都知，李漢奸係白鴿黨創黨主席，照道理講，即使黨友意見不合，兄弟姊妹閂埋門四四六六拆掂佢囉。哈，李漢奸就唔同人咁品，硬係要喺公開場合炮轟自己友，轟到白鴿黨冇晒癮。
先講所謂五區公投吖，白鴿黨由始至終唔贊成，認為係狗屁不通嘅戇居行為，偏偏李漢奸「眾人皆醒我獨醉」，係都要群埋黨外一堆政治老頑童亂搞一通，結果衰咗又賴皮，投票率低到只有百分之十七，成班友仔竟然厚臉皮到唔認係失敗喎。呢單嘢激到黨內元老司徒華紮紮跳，仲踢爆李漢奸曾經夾埋淫賤黎想捉佢上賊船。
跟住落嚟又點呢？由於黨主席何俊仁態度比較溫和，認為假如政府同意修訂政改方案，將新增區議會功能組別議席經民選區議員提名後交全港選民普選，就會積極考慮支持，所以李漢奸又開拖嘞。家陣只係普通黨員嘅佢，批評白鴿黨忘記咗最重要嘅終極普選問題，令人失望咁話。
唉，失乜鬼嘢望吖，人哋對賣黨叛徒失望就真。以副主席劉慧卿為例，即刻搶咪怒斥，李漢奸從來冇出席過黨大會，又冇參與過討論，係唔應該咁講嘢嘅。
至於黨主席何俊仁就話嘞，淨係識得企喺道德高地批評，質疑做緊具體工作嘅人，咁做對黨好唔公道！
呢嗱嗱嗱，你話勁揪唔勁揪？一個人居然可以賣完國家賣香港，賣完香港再賣黨，功夫茶思疑，萬一真係有外星人侵略地球，李漢奸九成九又會做叛徒，將成個地球徹底出賣。
既然同黨友貌合神離咁唔妥，不如退黨吖笨。可惜吖，李漢奸講到明唔會退黨，話會努力將民主黨「導入正途」喎。計功夫茶話齋，呢啲就係叛徒邏輯。試問，唔係中國人，點樣背叛中國呀？唔係香港人，點樣背叛香港呀？唔係地球人，又有乜資格做外星人走狗呀？所以咯喎，一於賴死唔走，咁先至可以將民主黨賣完一鑊又一鑊吖嘛。
冇耐之前，前國務院副總理田紀雲發表文章，內容係話，退休幹部唔好戀棧權位，切勿對現任領導人指指點點，即係唔應該退而不休。李漢奸已經唔係黨主席，仍然嘰嘰喳喳唱衰自己友，算唔算退而不休？講真，客氣嘅講句退而不休，刻薄嘅甚至可以話係老而不死。
功夫茶忠告地球人，叛徒出沒注意，小心有朝一日瞓醒覺擘大眼，領導人變咗外星人！