這陣子天氣翳熱，手足口病又來勢兇猛，生活沉悶冇驚喜，幸好政改風雲搞到好鬼熱鬧：一時話「成也白鴿，敗也白鴿」；一時見煲呔曾與白鴿黨有地下情；一時政改榮耀全歸白鴿黨；一時見李漢奸話白鴿黨已非昔日的白鴿，彷彿白鴿已被千里之外的墨西哥灣漏油染污，想飛也飛不起來，酸味湧動，五臟六腑都不是味兒。一時間，老朽真係接受唔到白鴿究竟是何物，真要學同文唱句「妖那媽所生」！
老朽其實層次好低，本想學那些公公婆婆去參加撐政改海鮮遊行團。一來老骨頭唔郁吓，超錯！二來民生多艱。孟子話「樂歲終身飽，凶年免於死亡」，樂歲終身飽，冇牙三姑都識整隻吉品鮑歎番餐，何須理會政府何時何日落實最低工資？如今雖不致凶年，可煲呔曾日日掛住起錨騷，懶理社會輿論狠批「扶貧無方」，淨係掛住起錨成唔成功，連「小電影」都拍埋嘅佢，大家仲想睇乜啊？
「政改向前走」，走到呢一步，啲黨員唔係大學校長，冇資格喺重要關頭話自己係「中立」，於是又要搬出選民做擋箭牌，想做逃兵，又要在歷史深處有技巧地表現「誠信氣度」、「人性光輝」、「氣節昭日月」。難怪有人說，晚明史之所以好看，就是熱鬧：閹黨和東林，壞人和好人，打得鮮血淋漓，看得熱血沸騰，涕泗橫流。至於其爭也激，其所爭很瑣屑，所謂一文錢打破頭者是也，這已非老朽所計較。
此趟政改風雲之詭異，煲呔曾的角色、身份最為「無間道」，坊間猜度最多，人人有不同睇法，老朽則覺滑稽，皆因兩個小偷吵架，難有莊嚴。