咦，醫管局又派錢畀人睇私家醫生，唔通終於發覺派畀老人家嘅長者醫療券過分孤寒，一年只得二百五十蚊雞碎咁多，所以忽然之間加碼敬老？睇真啲，受惠嘅的而且確有機會包括老人家，不過今次派嘅唔係長者醫療券，而係叫做共同護理計劃嘅診金。
呢嗱，就咁，醫管局話喎，試驗資助沙田及大埔兩區嘅糖尿病同高血壓患者，發信邀請病人參與下月推行嘅共同護理試驗計劃，名額一百人。呢個計劃係咁嘅，一年畀你一千二百蚊，攞去睇私家醫生啦。
嘩嘩嘩！長者醫療券係一年二百五十蚊，家陣呢個共同護理試驗計劃就大躍進至一年一千二百蚊，你都咪話出手唔闊綽。可能醫管局畀人鬧到怕晒，所以唔敢再係咁細眉細眼啩。
咪住咪住，一年一千二百蚊到底算唔算多？工聯會及香港健康社區網絡一項調查發現，八成半糖尿病及高血壓患者拒絕參與計劃，多達九成病人認為資助金額不足，六成七更加表示未聽過有關計劃。
唉，功夫茶呢鋪跌晒眼鏡，原來一年一千二百蚊同樣係微不足道，事關藥費其實十分昂貴，貴到你肉赤嗰隻。就好似有一位六十三歲鄺先生咁吖，每日服用六種藥，合共十三粒半藥丸，如果幫襯公立醫院，一年診金連藥費係二百七十元。好嘞，一旦參與共同護理計劃，改為幫襯私家醫生，你估藥費係幾多吖嗱？答案係，一年高達一萬零四百幾，昂貴三十八倍！
換言之，醫管局根本唔係誠心誠意幫助病人，只不過將佢哋大腳踢出公立醫療系統，然後貴客自理各安天命。喂，大拿拿一年過萬元藥費，你估人人負擔得起咩？負擔唔起嘅，又係咪等死？難怪另外有一位病人仇先生好激動咁講：「冇理由夾硬推我哋出來，即係等人冇錢買藥，死快啲！搵支槍指住我都唔會參加！」
即係咁，醫管局又諗縮數，佢出豉油你出雞，送你一千幾百，等你埋單過萬。咁搵笨嘅醫者父母心，全世界睇怕只有以蠱惑見稱嘅香港仔先至諗得出。工聯會新界東民生脈搏成員曾勁聰狠批，成個計劃唔湯唔水，資助金額與市場脫節。香港健康社區網絡主席梁耀才亦發炮：「根本就係畀個氹病人踩，逼人捱貴藥！」
所以話啫，醫管局確係算死草，畀佢算過度過，渣都冇得剩。好似講番長者醫療券咁吖，因為金額實在太少，所以使用率極低，政府冇乜損失，之但係如果有人真係由公營體系過檔私家醫生，庫房就慳番一大筆。同樣道理，呢個共同護理計劃即使拍晒烏蠅冇人參加，政府又係冇乜損失，之但係萬一有人落疊，醫管局陰陰嘴笑咯，唔使出錢出力照顧咁多病人。
計功夫茶話齋，醫管局縮骨成咁，主席胡定旭出嚟表演縮龍成寸縮骨功啦，衰鬼！