中環出更一：余若薇逛名店齋睇
公民黨黨魁余若薇（Audrey）早前喺「曾余辯」中憑鐵齒銅牙攞晒彩，大挫煲呔曾銳氣。贏咗牙骹戰嘅佢，原來靜雞雞同醫生老公胡健維行街睇戲慶祝，第一站係金鐘太古廣場時裝名店詩韻「The Swank」，平日硬朗嘅Audrey見到多款新裝做緊大減價，喺「衫海」中揀個不亦樂乎。
Audrey身材高挑，周身名牌。上周六傍晚六點幾，即係辯論後兩日，卓妮喺太古廣場遇見Audrey喺「詩韻」揀衫。「詩韻」雲集世界知名時裝品牌，呢排舖頭有六折大減價，試問邊位女士唔心動？
拍拖看《色慾都市２》
Audrey全神貫注揀衫，細心打量衣服嘅設計，身邊嘅老公似乎對女裝興趣唔大，但眼見太太揀得咁開心，惟有將雙手交疊喺身後，企埋一邊做護花使者。可惜新裝唔多啱Audrey心水，睇咗十分鐘都係冇斬獲。
離開「詩韻」後，Audrey並無轉戰其他名店，兩人拍拖往金鐘AMC戲院方向走，原來係買咗飛睇七點鐘開場嘅《色慾都市2》。呢部戲近兩星期成為唔少OL嘅茶餘飯後話題。戲中講述四位「潮女」追求不斷有驚喜嘅型格生活，電影不乏華麗服式，型爆打扮，對於鍾情走在時代尖端嘅Audrey，應該好有共鳴吧！