慘慘慘！加加加！港鐵冥頑不靈，面對市民強烈反對聲音，仍然堅持加價，一於當你透明！
醞釀多時嘅港鐵加價尋日正式開始，平均加幅百分之二點零五，部分路線甚至加價百分之二點七，亦會出現八達通貴過單程票嘅荒謬情況。
喂，如果話好世界，人人賺錢賺到眉開眼笑，你加價都冇咁肉酸吖。家陣係乜嘢環境呀？統計處冇耐之前公布，去年十二月實質工資下跌百分之零點八，即係升斗市民荷包縮水啦，港鐵加價咪就係叫做無良囉。最令人氣頂嘅係，港鐵舊年狂賺九十六億，完全冇加價壓力，居然仲要搜刮民脂民膏。港鐵嘅行為就好比一個貪得無厭大闊佬，當街當巷喺乞兒兜飯食。
唉，一日都係嗰個可加可減機制搵笨，成條數都唔知點計嘅，總之計來計去只得一個結論：公共交通機構永遠唔使減價，淨係有權加價。
計功夫茶話齋，大家最好做足準備，勒緊褲頭過日子喇，事關今年加風四起，阿貓阿狗都加價。天星小輪又話加，山頂纜車又話加，煤氣公司又話加。公務員就好啦，啱啱先至宣布加薪，不過小市民就唔好彩咯，加條毛就有你份！
真係愈諗愈氣頂，如果話港鐵加價係無良，加完價之後仍然罔顧乘客安全，咁又應該點講呢？功夫茶只可以諗到兩個字：冷血！
係呀，冷血呀，大家知唔知自從兩鐵合併之後，港鐵至今發生咗幾多次月台墮軌事件？講出嚟嚇你一驚，居然係五十八次，總共造成十七死三十三傷。至於月台空隙意外咯喎，去年接近二百宗，傷者不計其數。大家都知啦，如果港鐵月台加裝幕門，而唔係冇遮冇掩任人跌跌墮墮一仆一碌，死傷數字一定可以大幅減低，即使係生無可戀想跳軌自殺都跳唔成啦。
好嘞，月台加裝幕門都唔知講咗幾多年咯，港鐵亦以收取額外車費嘅方式「籌旗」，工程進度如何呀？真係冇人答到你，眼見嘅事實就係，三五七日就有列車將人輾到血肉模糊，恐怖到極嗰隻。
冇遮冇掩害人不淺嘅重災區係港鐵東鐵線，曾經有一位黃女士，喺旺角東站等車去羅湖，懷疑由於身體唔舒服，暈陀陀一頭撼落行駛之中嘅列車，半邊頭皮削去，事後送院縫咗三十幾針，醫生仲話有一節頸骨出現裂痕。呢嗱，如果月台有幕門，咁咪乜事都冇囉。
即係咁，你賺大錢加價已經係與民為敵，加完價又懶懶閒唔去加裝保障乘客安全嘅幕門就係草菅人命。
吖，話時話，深圳富士康十二連跳震驚全球，港鐵係咪應該記錄幾多連跳呢？不如咁嘞，麻煩監察公共事業嘅尊貴議員，詳細列出墮軌事件到底有幾多係純屬意外，幾多係跳軌自殺。如果港鐵證實超過十二連跳，頒個最冇人性獎畀佢都好吖！