吖，香港就話有「戒賭熱線」啫，唔知內地有冇嘅呢？唔好以為南非世界盃先至令到病態賭徒神魂顛倒喎，其實地下六合彩更加荼毒人心，絕對可以害到神州百姓家破人亡。
如果內地有戒賭熱線當然係好事啦，不過咁，其實更加好嘅係設立一條「戒賤熱線」，而且唔好態度被動等人打電話上去，應該主動出擊直接打電話搵人。搵邊個？答案係，淫賤黎。假如戒賤熱線真係可以勸得服淫賤黎戒除「為賤最樂」嘅不良嗜好，真係功德無量㗎，足以拯救萬千賭徒於水深火熱！
不如先睇睇淫賤黎有幾鬼祟先啦。冇耐之前喎，水警喺大埔截獲大批準備偷運入內地嘅港產六合彩報《創富》，本報踢爆，《創富》連同另兩份六合彩報《六合皇》及《貼士皇》經已靜靜雞改頭換面，轉咗承印人，但奇就奇在報刊註冊仍然維持原名。而更奇嘅係，本周一出版嘅三份六合彩報，報上刊登嘅承印人突然再次更改，變番同註冊資料一樣，即係淫賤黎擔任董事嘅公司——超企印刷及傳訊有限公司。三報承印人「明一間、暗一間」，兜兜轉轉，卒之又兜回原公司，如果話當中冇蠱惑，你信唔信吖？
正如法律界人士話齋，轉名背後一定有目的。乜嘢目的呢？呢三份六合彩報更改承印人，又冇向報刊註冊組申報，令人無法確認邊個係真正承印人，有意向三份彩報進行民事或刑事追究嘅人士，可能因為咁而無法索償，真正承印人亦因而有機會甩身。
淫賤黎鬼鬼祟祟、閃閃縮縮，原來係想瞞天過海，渾水摸魚，繼續播毒。係人都知，港產六合彩報走私北上，為禍神州，荼毒同胞，害到無數人傾家蕩產，家破人亡，早已人神共憤。呢，月初廣州有名男子持槍同警方對峙並駁火，最後被擊斃，死者就係地下六合彩嘅受害人，因為沉迷賭博而不可自拔，搞到傾家蕩產，走上不歸路。查實，多年來內地畀彩禍害到家破人亡嘅悲劇多不勝數，呢位受害人不過係冰山一角咋。
話時話，三份六合彩報承印人資料不盡不實，其實已涉嫌違反《本地報刊註冊條例》，哈，負責監管嘅影視處居然話乜都唔知。好啦，當你官老爺傻下傻下懵到上心口，經過本報踢爆之後，影視處先至話要調查，再交畀律政司跟進，遲唔遲啲吖。
唉，內地開賭吸血鬼之所以咁明目張膽，講來講去又係貪污腐敗，家陣除咗實物版六合彩報之外，竟然仲有網上電子版入侵千家萬戶，你話冇人包庇，白癡都唔信啦！有人質疑，走私六合彩報嘅不法分子背後有官方包庇，甚至懷疑有軍方嘅保護傘，睇嚟完全有可能。
除咗內地有問題，香港一樣有蠱惑。你知啦，走私六合彩報來來去去都係嗰幾條路線，水警又好，陸警又好，仲有海關，如果真係積極執法，捉雞仔咁捉啦，有乜可能畀佢哋源源不絕北上禍國殃民！
咦咦咦，咪住先，影視處真係懵到上心口，定係裝聾扮啞縱容淫賤黎煽動賭禍㗎？根據屢見不鮮嘅「官淫勾結」往績推測，睇怕都係裝聾扮啞居多咯。計功夫茶話齋，戒賤熱線嘅服務對象多幾個，就係助紂為虐嘅執法者，以及內地嗰啲貪官污吏！