萬眾期待嘅南非世界盃即將開鑼，身為忠實球迷嘅你，相信又會不惜捱眼瞓都要睇波。之但係，萬一迫於無奈要瞓覺覺豬，點先至可以收到新鮮滾熱辣嘅世界盃戰報？等功夫茶話過你知，一於睇《太陽報》啦，事關呢份穩佔全港銷量第三位嘅報章即日起進行精心大改革，全心全意為讀者提供全面服務。簡單嚟講，《太陽報》決定延遲出版時間，世界盃戰報將會一覽無遺！
如果大家未明功夫茶講緊乜，不如講得詳細少少。家陣報界慣例係千篇一律搶早出版，凌晨兩點左右就可以喺市面出售。問題係，凌晨時分假如有事發生，咁就冇辦法報道嘞。就好似世界盃咁吖，由於香港同南非有六個鐘頭時差，好多場賽事喺香港時間凌晨兩點半先至開波，點報道呢？其他報章一籌莫展冇晒符，《太陽報》就唔同嘞，因為延遲出版時間，所以能夠交足功課，為讀者提供最及時嘅全方位報道！
唔好以為延遲出版時間只係為咗世界盃喎，其實呢個係《太陽報》「衝破黎明、再起革命」嘅增值服務，投入更多人力物力提供全面資訊，打破一味搶早出版嘅格局，答謝超過一百二十九萬讀者自從創刊十一年以來風雨無間嘅熱烈支持。
你知啦，凌晨時分真係會有好多事情發生，本地又有，外國仲多。舉個例，好多名人明星最鍾意三更半夜蒲通宵，大家以後翻開《太陽報》娛樂版，將會見到好多圖文並茂嘅獨家猛料。又舉個例，當香港夜闌人靜嘅時候，歐洲股市以及美國紐約華爾街正正如火如荼炒上炒落，假如你係金融才俊，梗係希望知道更多更詳盡嘅金融消息啦，延遲出版時間嘅《太陽報》一定可以幫到你，唔止華爾街開市行情一覽無遺，連中午收市行情都睇晒！
有人可能會問，喂喂喂，有唔少讀者習慣凌晨兩點零鐘買報紙喎，《太陽報》延遲出版咪冇咁早買得到？功夫茶有一個建議，不如試下稍稍改變習慣吖，因為延遲出版等於全面資訊一網打盡，如果真係等唔切，先買份《東方日報》睇，一樣咁精彩。
其實呢，與其話延遲出版，不如話爭取每分每秒黃金時間為讀者呈獻優質新聞報道。當人哋收晒工大覺瞓，《太陽報》上上下下員工繼續不眠不休竭誠為讀者做到最好，淨係呢一份堅持到底嘅精神都已經令人感動啦。
功夫茶問問大家，點解《太陽報》可以穩佔全港銷量第三位嘅寶座？點解讀者人數又可以與年俱增，目前超過一百二十九萬，日後仲有前途無可限量嘅上升空間？答案其實好簡單，你在做，人在看，你肯捱肯搏肯不斷推陳出新，讀者係睇得出嘅，當然會用實際行動支持啦。
所以咯喎，計功夫茶話齋，《太陽報》經過今次破格嘅「衝破黎明、再起革命」之後，一定會更加受到讀者愛戴，讀者甚至會好似睇世界盃咁由衷讚嘆一句：好波！