警告！警告！鼠出沒注意！鼠出沒注意！各位街坊小心小心！
喂喂喂，唔係講笑㗎，真係有老鼠，而且係十吋長巨型老鼠，嚇到你鼻屎都猋晒出嚟嗰隻。大家唔好以為老鼠出沒嘅地方係污糟邋遢暗無天日嘅山旮旯，講出嚟可能又會嚇到大家猋鼻屎，出現鼠蹤嘅係香港心臟地帶，金融重鎮中環！
尋日下晝一點左右，有一位三十幾歲英國女遊客途經中環畢打街與德輔道中交界，忽然覺得右腳傳來一陣劇痛，即刻耷低頭望下發生乜嘢事啦，嘩！老鼠呀，好大隻老鼠呀！原來係十吋長巨型老鼠咬到佢流血，嚴重到要向警察求助，再急送瑪麗醫院治理。
呢嗱嗱嗱，問你驚未？中環大街大巷居然有大大隻老鼠大搖大擺飛擒大咬，你話係咪大禍臨頭大大鑊？如果全香港只係得一隻老鼠，你當然可以話功夫茶誇誇其談大驚小怪，問題係，鼠患其實一直存在，今次殺出中環咬人，以後難保唔會爆發鼠疫。你知啦，負責滅鼠工作嘅食環署好低能㗎，一旦鼠患成災，嚇走外國遊客尚在其次，最慘係病毒傳播死得人多呀！
食環署到底有幾低能？就咁，有一次喎，廣州滅鼠大王李鏡就獲邀來港示範捉老鼠，喺旺角一小時之內活捉十七隻老鼠。至於食環署咯喎，又有一次喎，防治蟲鼠監督出席油尖旺區議會，公布一大堆數據，其中一項顯示，油尖區兩個月捉到兩隻老鼠，即係平均一個月一隻，畀區議員笑到臉黃。冇錯嘞，就係咁低能，人哋一粒鐘捉十七隻，佢哋一個月捉得一隻。
低能表現唔止咁少㗎，區議員問食環署呢班捉鼠敢死隊，你哋係點樣衡量一笪地方有冇老鼠㗎？防治蟲鼠監督就話嘞，哦，係咁嘅，署方會喺街市或者其他出現過鼠患嘅地方，用尼龍繩掛起幾十個大約四十克嘅生番薯，幾日之後睇吓老鼠咬過嘅痕迹，從而計算相關指數。呢個偉大言論一出，又係畀區議員笑到臉黃。傻仔都知啦，街市美食如雲，又海鮮，又乳鴿，又燒肉，老鼠聰明絕頂精甩辮，點會咁蠢去咬冇厘味道嘅生番薯吖！
區議員再問，點解要用生番薯做鼠餌嘅呢？戇居答案簡直令人噴飯，佢哋話喎，叉燒或者燒肉等等食物好難見到老鼠牙齒印，所以要用容易見到牙齒印嘅生番薯。功夫茶諗起一則笑話，從前有條蛋散跌咗銀包，喺一支燈柱下面轉來轉去搵呀搵，有途人問佢，你點解唔試下去其他地方搵？蛋散就話嘞，其他地方冇燈吖嘛，燈柱下面有光，咁就容易搵嘞。
咁低能嘅滅鼠表現，話就話好笑到肚痛啫，其實笑中有淚，淚中更加有令人心膽俱裂嘅驚嚇成分。喂，鼠疫唔係講笑㗎，萬一香港整一劑黑死病，大大大大大鑊咯！
當功夫茶求下你啦食環署，快啲做好滅鼠工作，家陣搞到金融重鎮中環出現老鼠咬遊客，你唔知醜啫，金融才俊冇面呀！