報時訊號一響，嗶：「特首話減碳，市民點解仲咁？要捉拿氣候逃犯，即上綠色和平網頁，畀橋救氣候。」
咦咦咦，搞乜鬼？點解報時訊號會有通緝啟事？哦，原來係環保團體綠色和平嘅創意發揮，一連七日借助收音機大氣電波發功，誓要將氣候逃犯曾蔭權緝拿歸案咁話。「擒特首」報時訊號每日播出十次，每次大概八秒，希望可以救得番千瘡百孔嘅地球。
唉，話時話，地球有冇得救真係好難講，你知啦，香港嘅環保政策確係好惡頂，搞來搞去唔知搞邊科。好似話鼓勵市民使用零排放電動車咁吖，大家知唔知家陣全港有幾多部電動車？答案竟然係，截至四月底為止只有五十七部咁大把！
電動車少得可憐固然係可悲，更加莫名其妙嘅係，香港明明有自己開發嘅品牌MyCar，政府有份資助o架，點不知官老爺捨近圖遠，唔用本地薑，反而走去買日本貨。如果有效改善空氣污染，崇唔崇洋本來都冇乜相干，問題係電動車政策確係得啖笑，事關充電系統依然鳳毛麟角少到冇朋友，冇電又點揸車呀，老細！
呢嗱嗱嗱，特區政府又玩嘢喇，曾蔭權話喎，香港將會跟隨中央政府嘅減碳目標。表面上好似冇乜嘢，跟中央咪跟中央囉，實際上就搵你笨。綠色和平計過數，如果香港跟隨中央，二○二○年嘅溫室氣體排放量會比一九九○年增加百分之六，違背聯合國對發達地區減排百分之二十五至四十嘅要求。換言之，香港未來廢氣排放量將會不降反升，減排係假承諾，增排係真面目。
氣候逃犯對地球見死不救已經千不該萬不該啦，吖，死得佢吖，政府居然連人哋抗議都話唔准，惡氣騰騰又拉又鎖。五月十九日喎，綠色和平九名成員只不過喺政府總部以外一公里嘅行人路寫上「救氣候．擒特首」啫，九個人全部被捕。即係話，擒特首尚未成功，捉平民心狠手辣，呢個都唔知係乜嘢世界，唔通官老爺嘅良心真係攞咗去餵狗？
計功夫茶話齋，有時又未必怪得晒曾蔭權，事關呢位仁兄腦筋轉得幾快大家心照，如果唔係都唔會搞出一場政改辯論激嬲全世界嘅荒謬劇啦。其實，環境局局長邱騰華都有好大責任，最失敗嘅就係，邱局長唔識得食君之祿、擔君之憂，交唔出奇謀妙計都算嘞，雪上加霜嘅係跣到頂頭上司一仆一碌。記唔記得慳電膽益親家事件呀？成件事全靠邱騰華「屎橋獻給你」，獻世傑作最終搞到慳電膽無用武之地。
所以咯喎，如果話曾蔭權係氣候問題嘅頭號通緝犯，邱騰華就係二號通緝犯。可惜，小市民手無寸鐵，捉拿通緝犯歸案有相當難度。不如咁啦，男人老狗好多時候受軟唔受硬，等功夫茶陰聲細氣軟綿綿溫馨呼籲：嚟啦，乖啦，小寶寶好聽話嘅，兩個通緝犯快快主動自首啦，衰鬼！