好嘞，特區政府終於正正式式破咗一項紀錄。乜嘢紀錄咁巴閉呢？就係創下回歸以來最議而不決、決而不行嘅香港紀錄，早於一九九八年已經提出嘅活雞屠宰中心構思，尋日由食物及衞生局局長周一嶽宣布爛尾，拖拖拉拉十二年，結果拍拍屁股一事無成。
老董在位之時嘅乜乜中心物物港，唔提等於不存在嘅自我毀滅期限，通常不過幾年貨仔，老周居然有能拖得過十年，功力尤勝老董一籌，可喜呀！可賀喎！
既然拖咗十二年流流長，大家可能開始善忘，唔係好記得當初點解要醞釀成立中央屠宰中心，咁就等功夫茶簡述一下來龍去脈啦。即係咁，九七年爆發禽流感吖嘛，政府於是整一鋪震驚全球嘅瘋狂殺雞大行動，然後咯喎，構思中央屠宰，避免病毒襲人。事情發展到後來，活雞數量由原本每日六萬隻下降至一萬四千隻，只佔市場供應量百分之六，另外三成係冰鮮雞，其餘六成幾係雪藏雞。活雞數量已經大幅減少，加上香港目前採取日日清政策，活雞唔准留過夜，局長要你三更死，不得留雞到五更，所以周一嶽就好老定咁話，禽流感風險處於低水平。
禽流感風險究竟低成點？周局長話喎，數據顯示，活雞零售點嘅禽流感病毒活躍性，由○八年家禽業界退還牌照計劃前嘅大約百分之五，大幅降至百分之零點零九。一來活雞數量少，二來病毒風險低，所以咯喎，成立中央屠宰中心變得不切實際。
唔知大家點睇，功夫茶就覺得，中央屠宰中心爛尾都未算太可惜，最慘嘅係當初受騙嘅雞販。喂，係你指天篤地話會成立中央屠宰中心，靠劏雞搵食嘅雞販先至會乖乖交出牌照咋喎，諗住疊埋心水走去幫你打工，家陣你左搞右搞先至話搞唔成，人哋咪畀你跣到一仆一碌？好搵笨啫！
唉，舉一足以反三，一個中央屠宰中心爛尾，其實反映成個特區政府嘅施政作風係幾咁頹廢。董建華嘅空中樓閣係咁，曾蔭權嘅畫餅充飢又係咁，十大基建搞成點呀？西九文化區幾時有得玩呀？反高鐵風波表面上勉強過咗一關，不過功夫茶有一個不祥預感，捍衞菜園村事件未解決㗎，跟住落嚟未知會唔會又係一鑊粥。
煲呔曾為咗硬銷政改方案大嗌起錨，雖然嗌到不倫不類，但係用心始終叫做良苦。可惜吖，嗌口號唔等於辦實事，有志者不代表事竟成，如果單靠嗌口號就可以夢想成真，五、六十年代嘅中國已經實現大躍進啦！
睇番自從回歸至今，一次又一次議而不決，一餐又一餐決而不行，爛尾嘅中央屠宰中心仲破埋紀錄添，仲敢講起錨？唔好過分奢望咯，如果只係繼續拋錨已經還得神落，事關拋錨點都好過沉船！