呢排香港立立亂，政治爭拗無日無之，嘈到人人頭昏腦脹，連高等學府中文大學亦亂晒大龍，居然搞出一場「厚女神薄孫中山」嘅鬧劇，將孫中山銅像棄於暗室，簡直荒謬絕倫，大逆不道。唔通香港真係撞咗邪？
件事係咁嘅。中大校長劉遵義舊年十二月主動與孫中山孫女孫穗芳聯絡，希望佢捐出一尊孫中山銅像畀中大，而且聲稱今年二月底可以將銅像豎立喺中大校園。孫穗芳見中大咁有誠意，梗係卻之不恭啦，於是出錢出力鑄銅像，並於今年一月運抵中大。點知劉遵義收到銅像後阿芝阿佐，一時話選址、安全等問題仍待討論，一時又話自己離任在即，要交畀下一任校長處理喎。就咁，堂堂孫中山嘅銅像居然被打入冷宮，鎖入儲物室，唔知幾時先至可以見到天日。
正如古人話齋，我本將心向明月，奈何明月照溝渠。孫穗芳好心好意向中大贈送銅像，竟被劉遵義耍完一次又一次，真係佛都有火，難怪佢直斥中大處理民主女神像同孫中山銅像嘅手法大細超，仲反問校方，「是不是我不夠兇？」
係咯，民主女神像唔立又立，遲嚟先上岸，而孫中山銅像就被鎖入黑房近半年，冇人問冇人理，校方厚此薄彼，唔通真係學生兇啲？唔通掛住個民主招牌就可以打橫行？功夫茶真係唔明，嗰班所謂泛民主派，一聽見中大拒立民主女神像，就起晒弶，喊打喊殺，但中大將孫中山銅像鎖喺暗室，褻瀆先賢，又唔聽見佢哋出句聲！
其實，講起民主，孫中山身體力行，係所有中國人公認嘅「民主先行者」，好話唔好聽，佢出生入死，四處奔波推動中國民主嗰陣，咪話中大呢班學生，就算嗰班開口埋口民主同普選嘅政客都未出世喇，佢哋算老幾喎。
再講吖，就算民主不分先後，孫中山畢生提倡嘅三民主義總共有三個「民」，而所謂民主女神，數來數去只得一個「民」，唔使學似煲呔曾搞乜嘢電視辯論，係人都知邊個先至係真民主，邊個銅像更值得豎立喺中大校園喇！
不中不西嘅所謂女神可以得到特別禮遇，而帶領中國人推翻封建帝制，建立民主共和，全世界冇人唔識、冇人唔尊敬嘅孫中山銅像，卻喺自稱「致力繼承和弘揚中華文化」嘅中大備受冷落。呢種所作所為，豈止唔尊重孫中山先生，簡直係數典忘祖，與中華民族為敵，與炎黃子孫為敵。
唉，香港淪落到咁嘅地步，如果孫中山泉下有知，唔知會有乜嘢感慨。香港係孫中山接受教育嘅地方之一，佢甚至講過，「我之革命思想，完全得之於香港」。估唔到提供革命思想嘅香港，今時今日連一尊銅像都容納唔到，你話係咪好諷刺、好悲哀呢？
講開歷史，不妨講多一筆。孫中山臨終前留下遺囑：「革命尚未成功，同志仍需努力。」計功夫茶話齋，喺香港，呢句說話應該改成：「回歸尚未成功，港人仍需努力。」