升降機話起唔起　順天邨畀官激死

落成二十九年嘅觀塘順天邨依山而建，一直存在一個相當頭痕嘅問題，居民出入必須經過又長又斜嘅樓梯，先至可以到達巴士或者小巴站，即使年輕力壯後生仔女都會行到索晒氣，萬一係行動不便老人家，弊傢伙咯，簡直慘無人道。好似一位八十四歲患有痛風嘅祥叔咁吖，佢話每次上落都要好小心，因為唔覺意跌低後果非常嚴重，每次要最少半粒鐘先至行得完成條長命斜。

好嘞，既然順天邨居民苦不堪言，身為大業主嘅房屋署係咪應該福為民開，興建升降機予人方便呀？冇錯，應該當然係十分應該，而且事實上，經過居民多年爭取之後，房屋署早於二○○七年已經答應興建，連選址都有埋，鑽探工程都做過。之但係咁，事隔三年嘞，今時今日依然未見升降機，二萬居民照舊身水身汗徒步上落。點解咁古怪嘅呢？係咪議而不決、決而不行老毛病又發作呀？哈，唔講真係唔信，原來係官場擦鞋仔累事！

當地區議員郭必錚踢爆，○八年曾蔭權發表《施政報告》，提出會為全港依山而建嘅屋邨安裝連接公眾地方嘅升降機或者扶手電梯，自此以後，順天邨興建升降機計劃失驚無神擱置咗，唔知會押後到幾時。

呢嗱，大家睇睇先後時序，○七年房屋署答應順天邨興建升降機，○八年《施政報告》話全港山邊屋邨齊齊起，到咗二○一○年，順天邨繼續行樓梯，升降機話起唔起嘅關鍵原因係乜呢？好明顯，有人想擦鞋，屋邨升降機工程統統歸功於上大人，即係房屋署上司嘅上司煲呔曾。所以咯喎，擦鞋仔就犧牲公眾利益嘞，以討好老細為當務之急，一於懶理公公婆婆一步一驚心做一個苦命路人甲，全邨畀佢激鬼死！

唉，好心官老爺唔好咁自私，成日淨係掛住自己升官發財啦，順天邨都話落成二十九年咯，即係邨內人口老化㗎喇，七老八十邊得嚟咁好精力行樓梯呀？大吉利是講句，行到心臟病發暴斃街頭邊個負責呀？有一位姓程嘅女街坊講得好淒涼，佢話：「我今年都八十九歲，唔知幾時起好部，希望我有命睇到啦！」

話時話，房屋署想擦鞋啫，曾蔭權可以唔受擦。所以咯喎，功夫茶公開呼籲煲呔曾，畀人擦鞋無疑係會飄飄然，不過做下好心啦，縮開你對腳唔好畀人擦，順天邨等緊一部救苦救難升降機㗎，火速下令房屋署開工啦，唔該！