政情：鐵頭仁搵十姑娘座駕載黨友

民主黨前晚漏夜通過支持政改方案，惹來社民連踩場，以「鐵頭仁」何俊仁為首嘅幾名黨高層，最後由警方護送下登上一部房車離開銅鑼灣教協。佢哋坐嘅房車睇嚟都幾殘舊，但原來大有來頭，登記車主係一間公司，而公司嘅股東正是十姑娘嘅愛兒何東舜銘及陳復生，箇中因由就要追溯到○六年鐵頭仁被幾名大漢襲擊開始。

民主黨中人透露，自鐵頭仁被人襲擊後，當時聘用佢做代表律師嘅十姑娘何婉琪，就提供一輛房車連司機及保鏢畀鐵頭仁，仲一直享用至今，前晚更出動益黨友，接載埋劉慧卿、李永達及張文光離開。

睇番前晚現場情況，雖然鐵頭仁個保鏢收咗工，但部車連司機足足坐咗六個人，涉嫌超載一人，唔知警方係咪想盡快安全護送佢哋離開而隻眼開隻眼閉呢？講番呢部啡色房車牌子，係法國標緻（Peugeot），汽缸2000cc，九五年出廠至今已有十五年車齡，相當襟用，但當時車價都要二十五萬元。