乜嘢叫做大快人心？何謂公道自在人心？睇下呢一單法庭裁決啦。自稱「公信第一」嘅《明報》被控誹謗《東方日報》及其管理層，高等法院原訟庭頒發判決書，裁定《明報》誹謗罪成，必須向東方賠償合共一百八十萬元，當中包括加重性額外賠償，如果計埋雙方嘅律師費，賠償隨時達數百萬元。亦即係話，邪不能勝正，偽君子自取其辱，《明報》受到應得懲罰！
大家可能會問，扮晒叉燒嘅《明報》古靈精怪都唔係第一次㗎嘞，今次又點樣誹謗東方呀？講起嚟可以好長篇，亦都可以好簡潔。先講簡潔版吖，有一個「香港拉登」馬照聲，不斷公然散播抹黑東方嘅潑婦言論，其他傳媒明知一派胡言，所以一概不理，惟獨是《明報》圖文並茂不惜做佢嘅傳聲筒，話係「如實報道」喎，其實係蠱蠱惑惑借頭借路含血噴人就真。法官明察秋毫，完全唔接納《明報》嘅狡辯，裁定所謂報道確屬誹謗。法官仲話，如果《明報》所言非虛，實在係香港社會嘅悲哀。
好嘞，大家可能又會再問，呢個「香港拉登」搞乜鬼惟恐天下不亂？嘩，講起嚟就真係一匹布咁長，不過故事性一流，嗒落好有戲劇味道，功夫茶建議大家斟杯茶食花生聽古仔。
從前喎，香港有一個特首叫做董建華，唔係幾受歡迎嗰隻，又有一個曾經兩次加入紀律部隊嘅人叫做馬照聲，古古怪怪唔係幾好老脾嗰隻。因為想逼老董落台，馬照聲為自己響咗一個相當嚇鬼嘅朵，就係香港拉登嘞。香港拉登喺○一年九月寫信畀《東方日報》，威脅策動「港版九一一」，要喺超市食物落毒，企圖以恐怖主義趕走董建華。喂，落毒唔係齋噏，馬照聲認真㗎，東方本着好市民責任，即刻報警，避免無辜市民受到傷害。警方的而且確發現超市有人故意落毒，跟住上門捉人移送法庭審訊，證據確鑿賴無可賴嘅馬照聲被判入獄六年八個月。
呢嗱，恐怖分子落毒害人，東方報警除暴安良，是非黑白係咪毋庸置疑呀？弊就弊在，馬照聲懷恨在心，出獄之後成隻人形烏蠅咁死纏爛打，不斷恐嚇以及抹黑東方報業集團，結果再被裁定兩項刑事恐嚇罪成，判監九個月。之但係，有人第二次出獄後仍死性不改，繼續滋擾，繼續抹黑，繼續中傷，總而言之係煩不勝煩嗰隻。有一次，就係○八年四月，馬照聲走去高等法院門前展示誹謗東方嘅橫額，《明報》利用顯著篇幅「獨家」圖文並茂大肆報道，偽君子夥拍真小人合力示範何謂同流合污。
好嘞，終於，《明報》被揭穿真面目，誹謗罪成，證明「公信第一」呢一塊爛鬼招牌係招搖撞騙嘅道具。
唉，冇計喇，將軍一去，大樹飄零，自從查良鏞查大俠離開之後，《明報》愈來愈陰陽怪氣，表面上扮到正氣凜然，實際上同反中亂港傳媒着埋一條褲，惟恐天下不亂。又要做婊子，又要立貞節牌坊，功夫茶最睇唔起滿口仁義道德嘅偽善之徒。
今次罪有應得受罰賠償，日暮途窮嘅《明報》會唔會痛改前非呢？講真，功夫茶淨係知道一條道理，如果《明報》死性不改，只有死路一條。學似毛澤東毛伯伯話齋，搗亂，失敗，再搗亂，再失敗，直至滅亡！潮州話飲茶叫「隻嗲」，家陣善有善報，惡有惡報，嚟，《明報》收嗲，大家隻嗲！