知錯能改，善莫大焉；知錯唔改，冥頑不靈。文過飾非、諱疾忌醫，只會愈錯愈離譜，愈錯愈不可救藥。呢啲道理連小朋友都知，偏偏政府高官唔知，你話係咪奇怪呀。
呢，申訴專員公署早排批評消防處「管理落後，監管不嚴」，語氣都幾重，但言之有理，唔係無的放矢㗎。點知消防處處長盧振雄條氣似乎唔多順，佢尋日回應話，公署嘅批評相當嚴厲，嚴重打擊消防員士氣，亦導致市民擔心消防處滅火救援以至緊急救護嘅能力喎。
冇錯，畀人批評的確難受，尤其係一向高高在上嘅高官，更會覺得難頂。不過咁，忠言逆耳，良藥苦口，申訴專員批評嘅語氣重唔重唔緊要，關鍵係講得有冇道理，對改善消防服務有冇幫助，如果人哋講得有道理、有幫助，咁就要接受啦，仲死撐乜嘢噃。
對於申訴專員質疑消防處巡查食肆嘅次數嚴重低於目標，盧振雄攞咗一堆數字出嚟做擋箭牌，話過去五年未被巡查嘅食肆只有四百幾間，又話佢哋每年仲會收到一萬二千宗食肆嘅新申請。講咁多耶穌，無非想話人手不足，衰咗「情有可原」啫。
問題係，消防工作人命關天，如果資源真係唔夠，管理層有責任去爭取，唔係翹埋雙手乜都唔做，更唔應該將人手唔夠當做推卸責任嘅藉口。近年本港發生多宗嚴重火災，多名消防員殉職，暴露出消防通訊系統落後、裝備陳舊、消防員人手唔夠等等弊端，雖然前線消防員不斷投訴，怨聲載道，但係問題一拖再拖，一直得唔到改善，試問咁係咪管理層嘅責任呢？
申訴專員批評消防處「管理落後，監管不嚴」，事關管理層嘅責任，百分之二百同前線消防員無關喇，又何來「打擊士氣」呢？就算真係有影響，至多係影響「官氣」，搞到坐喺冷氣房嘅管理層坐立不安啫。
講到士氣，消防處對申訴專員公署呢隻冇牙老虎嘅批評從來都當耳邊風，大家想知嘅係，究竟係因為通訊設備落後、防火衣出問題令同袍一個個葬身火海，咁對士氣打擊大，定係申訴專員嗰幾句批評打擊大吖？所以話，消防處嘅回應根本就係本末倒置，推卸責任。
盧振雄又話，消防處係緊急部隊，市民將性命交畀處方，如果被批評管理不善，會令市民擔心。冇錯，祝融殺人唔係講玩，正因為咁，消防處更加要以有則改之、無則加勉嘅態度對待批評，而唔係用「打擊士氣」嚟幫自己卸責。如果一味拒絕批評，點可以正視問題？如果唔正視問題，點可以改善？如果唔改善，點可以提高服務質素？如果唔提高服務質素，又點可能令市民放心？
消防安全隱患處處，警鐘早已長鳴，但消防處唔止扮聽唔到，面對批評仲大玩「掩耳盜鈴」，連警鐘都想拆埋。計功夫茶話齋，係咁消防處不如改名做「消音處」吖，笨！