凡事唔能夠只睇表面，咪以為公營機構高層畀立法會議員同審計署炳到頭耷耷、口窒窒，十足老鼠見到貓咁款，查實心入面可能偷笑緊，幾乎想拍手掌講聲「多謝晒」。
聽落又幾有黑色幽默噃。嗱，個人資料私隱專員公署早排畀審計署踢爆浪費公帑，洗腳唔抹腳，私隱專員吳斌更被指「大花筒」，要到立法會政府帳目委員會解畫。署方承諾作出檢討，進行一次「全身檢查」。
搵出問題，堵塞漏洞，本來係好事。奇就奇在，私隱公署有漏自己唔執，而係再做「大花筒」，重金請外人返嚟執漏。署方專門開咗個新位，叫「內務總監」，依家仲請緊人。既然掛住個「總監」頭銜，人工一定唔會奀，合約為期一年，年薪連同約滿酬金加埋約一百八十一萬，又係納稅人埋單，你話係咪要多謝審計署同議員吖？
咁高人工做啲乜？據講呢位總監專門負責全面檢視及監控公署內嘅管理同資源運作，以落實審計署同立法會政府帳目委員會提出嘅各項改善建議喎。私隱公署仲話，新官需要有「診症」本事，可以識別行政弱點同唔符合規定嘅事宜，並且提供解決辦法，負責檢討、監督及監察各部門啲工作流程。
嘩，真係愈聽愈得人驚。照署方咁講法，咪即係話以往公署內部管理同資源運作，完全係無王管，從來唔使檢討，亦一直冇人監管囉？唔怪得醜聞爆完一單又一單啦。
話時話，做好管理同資源運作係公營機構嘅本分，食得納稅人俸祿，做得好好睇睇天經地義，知錯就改、自我完善更加係義不容辭。署方應該喺內部搵適當人選負責統籌，由外面搵個對運作唔知頭唔知路嘅新手返嚟，等佢對公署內部運作有足夠了解，開始執漏，一年合約都差唔多夠鐘啦。未見行動，一百八十一萬公帑已經玩完，咪即係愈執愈漏？
至弊就係，無論政府定公營機構，最鍾意開埋啲可有可無嘅高薪職位益自己友。除咗當年副局政助風波呢個典型，西九管理局每年使幾百萬請咗個英國人做主管之後，仲要專門請個年薪兩百萬嘅人返嚟，服侍「洋和尚」唸「香江藝術經」，唔止搞笑，簡直係荒謬！
最得人驚嘅係，類似私隱公署咁管理混亂，使公帑唔肉赤嘅公營機構仲有大把，無論平機會、應科院定信保局等，統統有一本糊塗帳，個個都畀審計署同議員炳過。如果呢班倒米壽星個個有樣學樣，好似私隱公署咁，畀人踢爆醜聞就開個新位，請多個「內務總監」返嚟，咁納稅人咪好大鑊？
衰一鑊就開一個新位，話就話改善管理，實際上明益自己友。計功夫茶話齋，原來以民為笨，福為官開，至係公營機構嘅「宗旨」。