咦，衞生署署長林秉恩嘅厚臉神功睇怕練到九重皮咯喎，啱啱先至由於監管藥物不力而受到立法會譴責，隨即又企定定當眾發表講話，面對鏡頭嘅態度氣定神閒，完全唔似待罪之身。功夫茶記得細細個嘅時候，因為冇交功課而畀老師罰留堂，簡直冇面見人啦，最好搵窿捐添，仲邊夠膽一個屈尾十即刻走上台表演棟篤笑呀！
大家可能會問，功夫茶係咪暗示林署長表演棟篤笑？錯錯錯，唔係暗示，而係明示。不如聽聽林秉恩講乜東東先啦，主要係三大點，又可以叫做三大篤——
第一篤：去年購買嘅甲型H1N1豬流感疫苗，有效期至今年十月，到時會銷毀未使用嘅疫苗。
第二篤：疫苗過期未用而要銷毀，唔係浪費，只不過係完成歷史任務咁解。
第三篤：衞生署會研究點解香港接種疫苗嘅比率遠低於其他地區。
好嘞，解構一下林署長嘅偉論點解咁好笑。即係咁，如果係第二個眼高手低買咗過量疫苗，你可能會話，算吧啦，計錯數人之常情，財爺曾俊華夠餐餐計錯數咯，財政預算冇一次準，無謂深究咯。之但係，林秉恩與別不同，呢位署長係經過審計署同立法會定罪嘅，罪名係監管藥物不力，計錯數擺烏龍買錯藥係咪零舍滑稽呀？
至於講到銷毀過期疫苗唔係浪費，只不過係完成歷史任務，更加笑到你猋晒眼淚。根據同一邏輯，細路哥食飯食剩一大半，可以理直氣壯同佢阿媽講，我唔係浪費呀，嗰啲冷飯菜汁完成歷史任務之嘛。如果係公務員，唔使怕有人批評浪費公帑咯，一於大條道理反駁，喂，我幫納稅人嘅血汗錢完成歷史任務，絕對冇錯，反而有功！
咦咦咦，得得得，維港巨星匯攞一億掟落鹹水海嘅醜聞主角盧維思，咪一直唔認浪費公帑嘅，不如咁咯，照辦煮碗上訴，本大爺我實情係鼎力襄助一億公帑完成歷史任務！
林秉恩表演棟篤笑嘅高潮係第三篤，絕對係精髓中之精髓。疫苗點解會計錯數呀？點解過期未用呢？當然係因為冇人願意打針啦，而冇人願意打針嘅原因正正就係林秉恩冇交代清楚會有乜嘢後遺症。大佬，呢個打完針話癱咗，嗰個打完針又話四肢乏力，跟手又話疫苗唔知有乜嘢副作用，瓜咗老襯都唔知乜事，傻仔都唔會自動獻身幫你清貨啦。所以咯喎，疫苗就大量積存漚到臭，滯銷過天時暑熱賣棉胎。
你話嘞，林秉恩自己一手造成疫苗浪費，居然仲話要研究點解冇人打針，嗰一種幽默感的而且確唔係人咁品！
一篤笑，二篤笑，三篤笑，林署長總共表演咗棟篤三笑，大家有乜嘢感想冇呀？計功夫茶話齋，不如改行賣笑咯，唔好再做監管藥物不力嘅衞生署署長，費事再害人吖嘛。或者又可以咁講，待罪之身已經完成歷史任務！