見死不救聽得多，明愛醫院就係活生生嘅例子，大家有冇聽過見老不救？成日都話香港嘅公立醫院甩皮甩骨又甩轆，估唔到家陣淪落到涉嫌偽造文件幾乎害死人哋老竇。到底發生乜嘢事呢？嗱，聽古仔喇，聽落可能有少少恐怖成分，所以奉勸各位尋求家長指引。
就咁，有一位六十七歲姓周嘅伯伯，四月三十日喺老人院昏迷，急送荃灣仁濟醫院搶救，證實係右腦血管閉塞，即係俗稱嘅中風。據家人講，當時要求醫院將周伯送入深切治療部，但係當值醫生講咗兩句非常涼薄嘅說話：「ＩＣＵ只得幾張床，係都留畀後生仔啦！」
後來過咗大概兩個禮拜，周伯發燒，家人要求見醫生，點不知護士又講咗兩句十分冷血嘅說話：「你哋都預咗佢去o架啦，使乜咁傷心！」跟住落嚟，嚇到你傻，護士手持一份「勿予心肺復甦決定」文件，話已經得到周伯嘅媳婦同意簽署，所以一口拒絕為周伯急救。
嘩嘩嘩！人世間邊有心腸咁狠毒嘅媳婦o架！咦，咪住先，周伯嘅媳婦情緒激動強烈否認，話從來未見過有一份咁嘅文件。然後劇情峰迴路轉，由於家人認為有人偽造文件，所以報警求助，警員到場之後，院方改變口風，話係溝通誤會，而且即刻將周伯轉送設備較佳嘅內科病房。
講到呢度，大家明唔明仁濟醫院到底發生乜嘢事？根據表面證供推測，有人覺得病人年紀大嘞，老人家救唔救都冇所謂，所以利用一份「勿予心肺復甦決定」放棄搶救。更加離鬼晒大譜嘅係，原來文件係醫生單方面簽嘅，至於點解要老屈人哋嘅新抱，醫生始終支吾以對。
唉，見老不救已經荒天下之大謬，計功夫茶話齋，以今時今日嘅標準嚟睇，六十七歲唔係好老o架咋，事關香港人平均壽命長達八十歲。假如六十歲打後就冇醫生肯出手搶救，年過六旬嘅曾蔭權求神拜佛千祈唔好病。當然啦，公立醫院服侍權貴一向都賓至如歸嘅，譬如話，財爺曾俊華心臟病發，得到嘅救治服務簡直超一流。之不過咁，人一走，茶就涼，高官始終都會有一日做番平民，到時咯喎，各安天命。
講番周伯嗰筆，醫生未經家人同意單方面簽署「勿予心肺復甦決定」，算唔算有違醫德？社區組織協會病人權益幹事彭鴻昌係咁講嘅：「仁濟個醫生咁做，已經違反醫管局指引，操守極有問題！」
功夫茶諗諗下唔係好對路，食衞局局長周一嶽咪成日呻冇錢嘅，又話香港人口老化，醫療負荷沉重，所以密謀推出強醫金。喂喂喂，仁濟醫院見老不救係咪有陰謀o架？會唔會係借頭借路令到放棄急救老人家成為醫療慣例？
點都好啦，功夫茶祝福特區政府所有冷血醫官年年唔過六十歲，否則見老不救呢家嘢隨時自食其果o架咋！