有一個電視廣告係咁講嘅：請等等，我乜乜樂緊！估唔到現實世界有司機居然稍稍變調，講出咁嘅對白：請等等，我索緊Ｋ！
前日清晨喎，黃大仙龍翔道出現一架左搖右擺舞龍咁舞嘅貨車，交通警員都算醒目，發覺可疑之後即刻追逐一公里，終於將貨車截停。警員當然查問司機發生乜嘢事啦，對方竟然面無懼色坦白承認索Ｋ，而且叫警員等等先，似乎唔想有人阻住佢High爆。結果係點大家都估到嘞，警員以涉嫌藏毒及受藥物影響下駕駛罪名拘捕司機。
呢個迷幻司機大話夾好彩未搞到車毀人亡，其他類似個案就冇咁好彩咯。香港固然撞到砰磅硠，杭州前一排仲恐怖，有個司機索Ｋ之後開車，產生幻覺撞向多個攤檔，好似打保齡球咁造成十幾人受傷，甚至有傷者捲入車底。
講咗咁耐，功夫茶到底想講乜呢？其實呢，就咁嘅，警方對付酒後駕駛可以出動酒精快速測試，即係俗稱嘅吹波波，之不過咁，對付藥後駕駛就冇呢支歌仔唱咯，即係冇辦法利用類似儀器嚴打迷幻司機。
立法會昨日討論增加酒後駕駛罰則，有議員建議，應該將藥後駕駛一齊納入法例，事關情況愈來愈嚴重，幾乎每個月都有迷幻司機累己累人累街坊。你估政府官員點回應吖嗱？運輸及房屋局副秘書長朱經文話喎，執法同取證仍然存在問題，因為警方唔能夠因為懷疑司機濫藥而要求對方驗血或者化驗唾液，加上涉及藥物嘅種類繁多，測試有難度。簡單咁講，除非當場斷正，否則警方冇符，唔可以好似嚴打酒後駕駛咁樣對付藥後駕駛。
唉，真係冇辦法？任得迷幻司機橫衝直撞，好牙煙啫！
功夫茶諗起一個古仔，不妨同大家分享分享。有一個後生仔，嗶嗶巴巴對一位老人家晒命，嗱，你哋老嘞，我哋就唔同呢，有火箭，有飛機，有電腦，有電話，你哋嗰個爛鬼年代，乜叉都冇！老人家氣定神閒反擊，冇錯，我哋嗰個爛鬼年代就係因為乜叉都冇，所以我哋將火箭、飛機、電腦、電話發明出嚟，你哋死蠢後生仔有乜嘢咁把炮呢？
呢個古仔嘅教訓就係，冇咪整到有為止囉，無中生有根本就係人類進化史上最偉大嘅貢獻。所以咯喎，今時今日冇藥物快速測試啫，運輸及房屋局咪走去搵人發明一套出嚟囉，死蠢！
唔好忘記，香港臥虎藏龍有好多發明家，只不過經常被漠視咁解。
好似電動車MyCar咁吖，理工大學發明咗出嚟，特區政府居然愛理不理，走去買日本貨。又好似科技大學一早發明咗頭髮驗毒技術，特區政府又係闊佬懶理，話外國技術比較好喎。
計功夫茶話齋，事在人為嘅啫，發明藥物快速測試一定有辦法嘅，除非黑心官僚懶到出汁，任得司機索完Ｋ撞到嘔白泡！