弊弊弊，手足口腸病毒殺入娛樂圈喇！歌神張學友前晚出席慈善演唱會，自爆全家都曾經染疫，兩個囡囡先中招，發高燒仲屙足兩日。學友自己亦發燒，不過最慘情係張太，即係當年開心少女組成員羅美薇，嘔到反晒胃。
中招嘅唔止學友一家，嗱，Beyond樂隊成員黃家強個囝囝就出現過發燒症狀，嚇到佢一額汗。大家如果想了解詳情，最好買份《太陽報》睇吓，近日《太陽報》再起革命衝破黎明，將出版時間延遲至凌晨三點之後，可以盡收猛料，報道零舍詳盡。
呢次手足口腸病毒疫情的而且確來勢洶洶，家陣連名人都中招，即係話全港市民都有機會染病啦。衞生防護中心日前公布，全港新增二十四間學校爆發疫情，到六月四日為止，錄得三百零八宗院舍爆發個案。更得人驚嘅係，疫情唔單止擴散範圍大，殺傷力亦係十年嚟最勁。唔好以為手足口病只係發吓燒咁簡單，其實隨時會攞命，患者有機會出現病毒性腦炎等嚴重併發症，唔及時醫治就瓜老襯。上月底，聯合醫院有個女護士就懷疑感染腸病毒死亡。
大敵當前，六月圍城，政府仲傻吓傻吓。今年疫情來得特別早，二三月份，內地、日本、台灣、新加坡就大規模爆發，香港一早已被腸病毒包圍。無論點講，港府都應該做番啲嘢啦，可惜班高官好似乜事都冇發生過咁，連內地嘅疫情通報都唔當一回事。政府翹埋雙手，腸病毒梗係長驅直入啦，學校、幼稚園一間間失守。難為班高官仲滋油淡定，話暫時唔考慮全港學校停課喎。直到嗰位護士過身，佢哋先至識驚，話今年嘅手足口病疫情會係十年嚟最嚴重咁話。唔怪之得有人話，政府係唔死人唔做嘢嘅。
本來，防疫都唔係咁難啫，腸病毒係透過病人嘅口水、鼻涕等分泌物傳染嘅，要教育細路保持個人衞生同環境衞生，咳嗽或者打乞嗤都要扲嘴，仲要「洗手、洗手、洗手」，細路經常接觸嘅物件要定時消毒。可惜班官員懶到出汁，本報記者日前踢爆，好多康文署轄下兒童遊樂場設施都冇定時消毒，又冇消毒藥水供應，細路分分鐘中招。
學校爆發傳染病，政府頂唔順就停課，將學生趕返屋企就關人個關。學生唔返學，就會去圖書館、自修室、兒童遊樂場，而呢啲場所都變咗病毒傳播黑點。政府以防疫為名，行卸鑊之實，直情係官害民命。
港府對傳染病疫情不嬲束手無策，嗱，沙士、禽流感、豬流感，仲有手足口病，邊次唔搞到一鑊泡呀？所以功夫茶奉勸各位，千祈唔好靠衞生官員打救，都係自求多福啦。