踩上心口剃眼眉 騎劫警署唔出奇

大家可能會話，功夫茶你傻咗咩，又話離奇盜竊案，又話完全唔出奇，好自相矛盾啫。呢嗱，講古唔做得駁古，唔出奇嘅只係話警署有賊，離奇嘅係犯案動機，賊佬嘅偷竊目標居然係蔫崩爛臭充滿麻甩汗味嘅未洗警服，你話離奇唔離奇？制服誘惑冇理由咁變態o架！

不如咁，簡單交代一下到底發生乜嘢事先啦。一名據講讀書成績好標青嘅大學畢業生，現職係青山醫院輔助醫療團隊，漏夜走咗去上水警署，輕輕鬆鬆穿過電閘罅隙，簡簡單單避過天眼防線，如入無人之境直上四樓洗衣房，一嘢擸走九件未洗嘅警察制服，包括五條電單車警員緊身褲以及四件軍裝警員藍色恤衫，整個偷竊過程無人察覺。

偷衫怪賊完成壯舉之後，打算從原路撤退，到咗呢個時候先至有警員撞見。本來呢，棄贓急逃嘅怪賊已經走甩o架嘞，唔知點解赤膊又赤腳喺附近街頭流連，惹起另一名警員懷疑，結果落網被捕。

好嘞，古仔簡述完畢，大家有何感想？功夫茶認為，今次就話只係偷衫啫，物質損失唔會嚴重得過名譽損失，下次可能會有不法分子甚至係恐怖分子直搗黃龍，踩上心口剃眼眉，騎劫警署唔出奇。騎劫警署期間萬一有師兄師姐被挾持做人質，特蠢部隊強攻營救又雞手鴨腳，咁就真係顏面無存，掉轉頭畀菲律賓警察笑到你臉黃。

你知啦，最危險嘅地方之所以係最安全，好多時候係心理因素影響，當你以為成幢警署碰口碰面都係差人叔叔，斷估冇人夠膽天堂有路你不走、地獄無門闖進來，防盜意識梗係極之鬆懈o架啦，隨時連普通一座大廈嘅看更伯伯都不如。喺咁嘅情況之下，賊佬咪有機可乘囉。

咦，咪住，記唔記得上海曾經發生過一單瘋狂殺警案？有一個叫做楊佳嘅男子由於不滿民警執法不公，單人匹馬闖入公安大樓見人就斬。嗱，咪話功夫茶嚇你，香港一樣有好多人不滿警隊野蠻執法o架，淨係捉示威者返去警署剝光豬搜身已經天怒人怨啦。所以咯喎，奉勸警務處一哥，好心吩咐手足加強保安啦，警務人員冇理由笨得過看更伯伯，更加冇理由蠢得過賓賓同行。

話時話，臭味警服真係咁令人着迷嘅咩？定係有不可告人嘅秘密，例如冒警？咁講啦，八二三慘案太刻骨銘心嘞，港人同胞唔想再見到變態佬穿上警察制服胡作非為，理得你係革職警員定係假扮差人。所以咯喎，唔該港九新界各地警署醒醒定定，嚴加看守洗衣房，少咗條褲都要當失槍查辦，除非被偷嘅係底褲，咁就另當別論。