升降機又玩跳樓　機電署嚴重甩轆

有一位風度翩翩嘅護花男子凌晨時分送女友返翠麗花園二十四樓屋企，離開嘅時候當然係搭啦，冇人咁笨行樓梯啫。點不知，人在中，身不由己，升降機傳出劇烈震動，然後高速墮下，短短八秒急降十層，由二十四樓直插落十四樓。話時話，假如事主比較迷信，一定心諗：撞鬼咯！該煨咯！由「易死」跌至「實死」！

當然啦，迷信係冇科學根據嘅，所以呢位仁兄冇咁黑仔，跌至十四樓唔係「實死」，反而因為緊急系統及時煞停，最終保住老命，被困十二分鐘之後由消防員撬門救出。雖然如此，經歷過咁恐怖嘅生關死劫，嚇到腳軟係人之常情。

升降機因乜事幹會高速墮下嘅呢？奉召到場調查嘅機電署人員話喎，初步證實肇事升降機四條鋼纜完好無缺，不過用作平衡嘅「對重鉈」框架斷裂，導致組成零件「鉈磚」移位。簡單咁講，升降機甩轆。

好嘞，甩轆係近因啫，遠因又係乜呢？香港電梯業總工會理事長謝景華為大家提供咗一個答案，佢話前年大埔富善邨發生墮事件之後，業界已經被要求重點檢查「對重鉈」，點知再有同類事故發生，明顯係機電署監管不力。

唉，又係機電署！

上次富善邨大話夾好彩，墮期間裏面空無一人，否則後果不堪設想。今次翠麗花園雖然都算好彩，事主只係嚇到腳軟，並無造成嚴重傷害，不過幸運指數愈來愈低，始終裏面真係有人吖嘛。功夫茶想問一問機電署署長陳鴻祥，你以為自己係天下無敵嘅行運超人呀？你以為餐餐都咁好彩唔會搞出人命呀？

咦咦咦，咪住先，機電署話就話會深入調查，睇下升降機甩轆嘅確切原因，之但係呢個政府部門往績非常之咁差劣，差到信唔過嗰隻。好似舊年救護車頻頻死火導致病人延誤救治咁吖，死因庭法官老實不客氣狠批，負責救護車維修保養嘅機電署馬虎兒戲，建議消防處搵其他車房做好維修工作。又好似今年石油氣的士集體死火咁吖，機電署左調調、右查查、上研研、下究究，你估得出一個乜嘢結論吖嗱？佢哋話喎，建議的士司機平時做好維修保養。換言之，的士集體死火與石油氣供應商無關，確切原因係一個無法破解嘅千古謎團，機電署一嘢將監管責任推卸得乾乾淨淨。

講到呢度，功夫茶愈來愈擔心，甩轆嘅唔止升降機，死火嘅唔止救護車，既嚴重甩轆又嚴重死火其實係馬虎兒戲嘅機電署，你話香港人出出入入有乜嘢保障先？唔通撳掣搭之前要寫定遺囑？一個唔覺意有乜頭暈身慶要搭救護車，莫非又要填定器官捐贈同意書？

計功夫茶話齋，機電署表現弱雞成咁，一係徹底改組，一係索性改名，叫做「雞電署」吧啦！