各行各業好多時候都會有年齡限制，有時係下限，有時係上限。好似特首呢份工咁吖，假如你未滿四十歲，一律視作「未夠秤」，你係冇資格參選嘅，話之你幾咁得到北大人寵幸都冇用。至於普通公務員咯喎，上限通常係六十歲，一夠鐘就要退休咬糧，或者返鄉下耕田，或者改投私人機構做個超級保安員之類。
日會落，人會老，夕陽無限好，只是近黃昏，夠鐘之後有冇辦法賴死唔走呢？正常而言當然係唔得啦，天下無不散之筵席嘛，不過間中都會有特殊例子。譬如每年獲公帑資助超過一千萬元嘅法定機構香港女童軍總會，擔任總監嘅年齡上限本來係六十五歲，之但係現任總監邊陳之娟已經六十有九，即係超齡四歲。換句說話嚟講，打從邊太吹完蠟燭、食完蛋糕、慶祝過六十五歲大壽之後，女童軍總會至今一直違規。
點解咁得意嘅？女童軍標榜日行一善，點解會變咗日日違規？根據自稱總會「內部人」嘅投訴者所講，總會內部指引列明總監職位每三年一屆，邊陳之娟於○七年首次獲提名競逐並且喺無對手情況下獲得任命嘅時候，已經係六十六歲，早就過咗年齡上限，所以投訴者質疑有人「隻眼開隻眼閉」。更加搞鬼嘅係，新一屆總監提名已於上月截止，而邊太再次成為唯一提名人選，投票選舉定於十一月舉行。
嗱，功夫茶唔贊成年齡歧視，七老八十精明能幹嘅大有人在，之不過咁，遊戲規則係唔可以隨便破壞嘅。既然根據《香港女童軍總會條例》，該會由政府資助運作，受到民政事務局監督，做事梗係要依足典章制度㗎啦，冇可能任由超齡總監千秋萬代手握大權，造成社會壞榜樣吖嘛。更何況，投訴者又質疑，女童軍總會近年設立以四至六歲幼童為招募對象嘅「小蜜蜂計劃」，本身開辦方方樂趣幼稚園嘅邊太，擔任手握資源調配權力嘅總監有利益衝突之嫌。
本來呢，功夫茶非常尊敬做好事嘅善長仁翁，女童軍如果真係日行一善，當然係值得鼓掌啦。問題係家陣爆出一單人事任命違規醜聞，仲要搞到涉嫌利益衝突，尊敬程度大打折扣嘞。
一名不願透露姓名嘅總會高層話喎，高層人員如會長、副會長、副總監以及助理總監等等全屬義務性質，根本唔知道總監人選有年齡限制呢家嘢，受薪職員又無人提醒，先至會有呢個爛攤子。
計功夫茶話齋，唔使諸多解釋，解釋等於掩飾，惟今之計係趁爛攤子尚未爛到入心入肺之前撥亂反正，你可以話係防患於未然，亦可以話係防爛於未然。再唔係咯喎，負責監督嘅民政事務局親自過問，速速修理一下相關人等。
講開又講，日行一善梗係政治正確啦，怕只怕變質淪為日行一賤，小心！小心！